Túrkistan oblysynyń sanıtarııalyq talaptardy saqtamaǵan medıtsına mekemelerine 75,6 mln teńge aıyppul salyndy

TÚRKІSTAN. QazAqparat- Túrkistan oblysynyń sanıtarııalyq-epıdemıologııalyq talaptardy saqtamaǵan medıtsına mekemelerine 75 634 206 teńge aıyppul salyndy, dep habarlaıdy QazAqparat tilshisi.

Túrkistan oblysynyń sanıtarııalyq-epıdemıologııalyq baqylaý qyzmeti 2022 jyldyń birinshi jartyjyldyǵynda 1 343 medıtsınalyq obektilerde tekserý júrgizdi. Nátıjesinde keıbir nysandarda ystyq sýdyń bolmaýy, jeldetkish júıeleriniń joqtyǵy, medıtsınalyq qaldyqtardy jınaý men saqtaý talaptarynyń saqtalmaýy sııaqty birqatar kemshilikter anyqtalyp, buzýshylyqtardy joıý boıynsha 75 634 206 teńge somasynda 1372 aıyppul sanktsııasy salyndy, 90 sanıtarııalyq uıǵarym berildi. 49 medıtsına qyzmetkeri jumystan ýaqytsha shettetildi, 11 materıal sotqa joldandy.

Túrkistan oblysynyń sanıtarııalyq-epıdemıologııalyq baqylaý departamenti halyqtyń sanıtarııalyq salamattylyǵyn qamtamasyz etý maqsatynda medıtsınalyq mekemelerdiń basshylaryn, sondaı-aq barlyq medıtsına qyzmetkerlerin QR DSM qoldanystaǵy normatıvtik quqyqtyq aktilerine sáıkes densaýlyq saqtaý obektilerine qoıylatyn sanıtarııalyq-epıdemıologııalyq talaptar men qaǵıdalardy saqtaýǵa jáne beıindi salalar boıynsha fýnktsıonaldyq mindetterdi oryndaý boıynsha jumys jasaýǵa shaqyrady. Sebebi, medıtsınalyq uıymdarda sanıtarııalyq-epıdemıologııalyq jáne dezınfektsııalyq-sterılızatsııalyq talaptardy saqtamaý óz kezeginde obektide túrli qaýipti ınfektsııalyq aýrýlardyń taralýyna ákep soǵýy múmkin.