Túrkistan oblysynyń polıtseıleri bir kúnde 191 jasóspirimdi bólimshege jetkizdi
«Túngi qaladaǵy balalar» profılaktıkalyq is-sharasy aıasynda polıtseıler men ákimdiktiń tıisti sala mamandary birlesip, túngi reıdtterge shyǵyp júr. Basty maqsat – jastar men jasóspirimderiniń beımezgil ýaqytta júrmeýin, oıyn-saýyq oryndarynda bolmaýyn qadaǵalaý.
Atalǵan sharanyń alǵashqy táýliginde Túrkistan oblysynyń polıtseıleri 191 kámeletke tolmaǵan jasóspirimdi bólimderge jetkizdi. Onyń ishinde jasóspirimderge qatysty 173 ákimshilik quqyq buzýshylyq anyqtaldy. Máselen, QR ÁQBtK-niń 127-baby (balalaryn tárbıeleý jónindegi mindetterin oryndamaǵan ata-ana) boıynsha 8 derek, ÁQBtK-niń 434-babymen (usaq buzaqylyq) 3 ákimshilik quqyq buzýshylyq tirkeldi. Al, QR ÁQBtK-niń 435-baby (kámeletke tolmaǵan adam jasaǵan buzaqylyq) boıynsha 5 jaıt boldy.
«QR ÁQBtK-niń 442-babynyń 2-bóligimen (túngi ýaqytta zańdy ókilinsiz turǵyn úıden tys jerlerde júrgen) 155 derek anyqtalyp, ákimshilik shara qabyldandy. 16 quqyq buzýshylyqqa beıim kámeletke tolmaǵan jáne 9 qolaısyz otbasy ІІO-nyń profılaktıkalyq esebine alyndy», - delingen Túrkistan oblysy polıtsııa departamentiniń baspasóz qyzmeti taratqan aqparatta.
