Túrkistan oblysynyń meshitterinde kópshilik namaz oqyla bastady

TÚRKІSTAN. QazAqparat – Túrkistan oblysynyń meshitterinde kópshilik namaz oqyla bastady. Bul týraly búgin óńirlik kommýnkatsııalar qyzmetinde ótken brıfıngte óńirdiń bas ımamy Musabek Aqtamberdi málimdedi, dep habarlaıdy QazAqparat tilshisi.

Bas ımamnyń aıtýynsha, oblystaǵy 748 meshittiń 632-inde juma namazy oqyla bastaıdy. Al, ózge bes ýaqyt namazdar barlyq meshitterde oryndalady. Bas sanıtar dárigerdiń qaýlysy boıynsha, jamaǵattan ara qashyqtyqty saqtaý talap etiledi. Syımaǵandar meshit syrtynda qulshylyq jasaıdy.

Aıta keterligi, meshitter jalpy kópshilikke 2 kezeńmen ashylady. Aldymen aýdan-qala, aýyldyq okrýgterdegi jamaǵaty kóp jınalatyn iri meshitter ashylady. Ekinshiden, barlyq aýyl-aımaqtyń meshitteri jappaı jamaǵatty qabyldaı alady.

«Karantın jaǵdaıynda meshit qyzmetkerleri men kelýshiler mindetti túrde betperde kııýi tıis. Barlyq meshitterdiń namaz oqıtyn, quran oqıtyn bólmeleri antıseptıkalyq quraldarmen qamtamasyz etiledi. Kelýshiler 1,5 metr araqashyqtyqty saqtaı otyryp jeke jáne jamaǵat namazdaryn oqıdy. Meshit dárethanalary qaýipsizdik maqsatynda karantın rejımi aıaqtalǵansha jabyq turady. Juma ýaǵyzy aıtylmaıdy. Juma namazynyń qutpasy men namazy 15 mınýttan asyrylmaıdy», - dedi oblys ımamy.

Sonymen qatar, bas ımam oblys ortalyǵyndaǵy 30 meshittiń ázirge 17-si ǵana kópshilikke ashylatynyn jetkizdi. Bul meshitterdiń qatarynda «Bekzat», «Quddys», «Aqmeshit», «Naqyp ata», «Igilik», «Tuıaqbaı», «Asanbaı», «Iassy», «N.Tórequlov» syndy qulshylyq úıleri bar.