Túrkistan oblysynda jazýshy Dýlat Isabekovtiń kitaphanasy ashyldy
Saltanatty sharada oblys ákiminiń orynbasary Ulasbek Sádibekov sóz sóılep, óńir basshysy Janseıit Túımebaevtyń syılyǵyn tapsyryp, quttyqtaý hatyn oqyp berdi.
«Sizdi Ordabasy aýdany, Jańaturmys aýylyndaǵy kitaphanańyzdyń ashylýymen shyn júrekten quttyqtaımyn! Shyǵarmalaryńyz - ómirdiń ózinen alynǵan. Aınaladaǵy kúnde kórip júrgen qubylystar ózindik qunarly da qarapaıym tilimen áleýmettik deńgeıge deıin kóterilgen shynshyl týyndylar. Ultynyń kókeıindegi oıyn aıtyp, joǵyn izdeýden tanbaıtyn, tereń oılary men qalam qazynasyn qatar ustap, únemi sergek júretin áıgili jazýshy ádebı orta men jalpy oqyrman yqylasyna bólengen baqytty jazýshy dep senimmen aıta alamyz. Shyǵarmashylyq qyzmette úzdiksiz izdenis pen tabandylyqty, qaıratkerlik pen tálimgerlikti qatar ustanǵan Siz álemdik órkenıettiń órisine bet túzegen uly kóshtiń aldyńǵy qatarynda kelesiz. Aldaǵy ýaqytta da elimizdiń ósip-órkendeýine qosatyn úlesińiz áli de eselene túsedi dep bilemin», - delingen.
Kitaphananyń ashylý saltanatynda QR Jazýshylar odaǵynyń músheleri, elimizge tanymal aqyn-jazýshylar men zııaly qaýym ókilderi sóz sóılep, zańǵar qalamgerdi qýanyshymen quttyqtady.
Atap aıtsaq, Erkinbek Turysov, Beksultan Nurjekeev, Marhabat Baıǵut, Qulbek Ergóbek, Qasymhan Begmanov, Qazybek Isa jáne ózge de qalamgerler sóz sóıledi.
Kitaphana ári murajaı retinde salynǵan úıde Dýlat Isabekovtyń kitaptary men túrli marapattary, ómiri men shyǵarmashylyǵynan syr shertetin zattar qoıylǵan. Sonymen qatar, qazaq jáne álem jazýshylary men aqyndarynyń kitaptary bar. Qalamger 2 500 kitapty ózi tartý etken. Aldaǵy ýaqytta bul kitaphana álemniń ádebıet jaýharlarymen tolyǵady.
Elbasynyń «Rýhanı jańǵyrý» baǵdarlamasy sheńberinde qolǵa alynǵan is-sharaǵa el aǵalary men oqyrman qaýym rızashylyǵyn bildirdi. Endi bul kitaphanadan tek Ordabasy aýdanynyń turǵyndary ǵana emes, osy aýdanǵa kelgen qonaqtar da rýhanı qazyna alyp, tanymdaryn keńeıtedi. Jıyn sońynda Dýlat Isabekov ózine qurmet kórsetken jerlesteri men oqyrman qaýymǵa, oblys basshylyǵyna alǵysyn aıtyp, qazaq ádebıetine úles qosa beretinin jetkizdi. Osy shyǵarmashylyq úıinde túrli shyǵarmalaryn jalǵastyratynyn aıtty. Saltanatty sharada Arys qalasy men Ordabasy aýdanynyń ónerpazdary ánnen shashý shashyp, eńbekteri Londondy moıyndatqan jazýshyǵa qurmet kórsetti.
