Túrkistan oblysynda Jastar forýmy ótti

TÚRKІSTAN. QazAqparat - Túrkistan oblysynda «Jastar jyly: Bolashaqqa jarqyn jol» atty forým ótti, dep habarlaıdy QazAqparat tilshisi.

Keles aýdanynda uıymdastyrylǵan aýqymdy sharaǵa aýdan ákimi Aqmentaı Úsenuly, oblystyq Jastar ortalyǵynyń basshysy Bereke Talǵatuly jáne aýdannyń belsendi jastary qatysty,

Jıynda jastar úshin jasalyp jatqan jaǵdaılardy utymdy jáne tıimdi iske asyrý máseleleri talqylandy. Ashyq pikir almasý alańyna aınalǵan forýmda kásipkerlikti bastaý jáne eriktiler jumysyn damytý, dinı ekstremızm men terrorızmniń aldyn alý sııaqty búgingi kúnniń ózekti problemalary qamtyldy. Jastar óz kásibin damytý men bilim berý salasynyń ozyq tehnologııalary, buqaralyq sportty damytý men áleýmettik jeliniń róli týraly oı bólisti.

Jastar saıasatyn damytý jaıy qamtylǵan jıynda qatysýshylar ózara pikir almasyp, tyń oılaryn ortaǵa saldy. Aýdan basshylary men Jastar resýrstyq ortalyǵy ókilderi, sondaı-aq belsendi jastar usynystaryn jetkizdi. Elimizdiń atyn álemdik jarystarda asqaqtatyp júrgen sportshylar men belgili bir maman ıeleri de jetistikke jetýdiń joldaryn aıtyp, tájirıbelerimen bólisti. Aýyl jastarynyń qoǵamda óz ornyn taýyp, turaqty jumyspen qamtylýyna baılanysty aqyl-keńester berildi.

Jıyn qortyndysymen aıtylǵan oı-pikirler men usynystar nazarǵa alynyp, birqatary aldaǵy ýaqytta júzege asyrylatyn bolyp kelisildi.

Sonymen qatar, aýdan basshysy jergilikti jerde jańadan qurylǵan Jastar ortalyǵyna qoǵamdyq kóliktiń kiltin tabystady.