Túrkistan oblysynda jappaı ýlanýǵa jol bergen qoǵamdyq tamaqtaný ornyna aıyppul salyndy
Tamaqtan ýlanýdyń bireýi úı jaǵdaıynda bolsa, ekinshisi Kentaý qalasyndaǵy qoǵamdyq tamaqtaný oryndarynyń birine qatysty, dep habarlaıdy QazAqparat QR DSM Sanıtarlyq-epıdemıologııalyq baqylaý komıtetiniń resmı saıtyna silteme jasap.
Kentaýlyq 8 azamattyń ortalyq aýrýhanaǵa jatqyzylǵandyǵy týraly sanıtarııalyq-epıdemıologııalyq baqylaý basqarmasyna shuǵyl habarlama kelgennen keıingi zerdeleý jumystary nátıjesinde, tamaqtan ýlanǵan 3 adamnyń Kentaý qalasyndaǵy fast-fýd ázirleýmen aınalysatyn dámhanadan sýshı, pıtstsa, taýyq etinen jasalǵan taǵamdar, lavash, chıken jegen.
Taǵy 5 azamattyń dál sol orynnan tapsyrys arqyly pıtstsa, chıken taǵamdaryn tutynyp, jedel ishek juqpasy dıagnozymen aýyrǵany belgili boldy.
QR DSM Sanıtarııalyq-epıdemıologııalyq baqylaý komıteti adam densaýlyǵyna qaýip tóndirgen tamaqtaný ornyna qatysty tekserý júrgizý boıynsha sharalar qabyldady. Sanıtarııalyq-epıdemıologııalyq baqylaý qyzmeti kásipkerlik nysandy tekserý barysynda ǵımaratqa epıdemııalyq máni joǵary obektiniń halyqtyń sanıtarııalyq-epıdemıologııalyq salamattylyǵy salasyndaǵy normatıvtik quqyqtyq aktilerge sáıkestigi týraly sanıtarııalyq-epıdemıologııalyq qorytyndysynyń alynbaǵandyǵy, ónimderdiń qaýipsizdigin kýálandyratyn qujattardyń bolmaýy, irimshik jáne shujyq ónimderiniń jaramdylyq merzimderiniń ótip ketkendigi, qyzmetkerlerdiń merzimdik jáne profılaktıkalyq medıtsınalyq qarap tekserýden ótpeýi, jumysqa ruqsattarynyń bolmaýy syndy t.b kemshilikter anyqtady.
Dámhana ıesi, jeke kásipkerge QR Ákimshilik quqyq buzýshylyq týraly kodeksiniń 425-babynyń 1-tarmaǵyna sáıkes 230 AEK kóleminde aıyppul salyndy. Sonymen qatar, atalǵan nysanǵa sanıtarııalyq-epıdemıologııalyq qorytyndy almaı jumys istegeni úshin atalǵan Kodekstiń 463 baby 1-tarmaǵyna sáıkes hattama toltyrylyp, is-qujattary sotqa joldandy.
Túrkistan oblysynyń sanıtarııalyq-epıdemıologııalyq baqylaý departamenti oblystaǵy qoǵamdyq tamaqtaný oryndaryna, kásipkerlik nysan ıelerine sanıtarııalyq talaptardy saqtaýǵa, adam ómirine qaýip tóndiretin jaǵdaılardyń aldyn-alýǵa shaqyrady.