Túrkistan oblysynda jańbyrlatyp sýaratyn tehnıka shyǵarylady
Jańbyrlatyp sýarý úshin paıdalanylatyn AQSh-tan ákelinetin arnaıy tehnıka osy aýdanda shyǵarylmaq. Importtyq tehnıkanyń balamasyn jasap shyǵarý isi oblys ákimi Ómirzaq Shókeevtiń bastamasymen qoldaý tapty, dep habarlaıdy QazAqparat tilshisi.
Saıram aýdanyna jumys saparymen barǵan oblys basshysy atalǵan zaýyttyń jumysymen tanysty. «Kaspy Construction» JShS búginde aýyl sharýashylyǵy tehnıkalaryn jasap shyǵarý isin jolǵa qoıǵan. Egin alqabyn jańbyrlatyp sýaratyn qurylǵylardy qolǵa alǵan kásiporyn tas maılaıtyn, daqyl tazalaıtyn qondyrǵylar óndirisin júzege asyryp keledi. Sýdy únemdep, ónim túsimin tórt esege deıin arttyratyn jańbyrlatyp sýarý tehnıkasyn jasap shyǵaratyn kásiporyndy Túrkistan qalasynan da ashý kózdelgen.
Aımaq basshysy Aqsýkent aýyldyq okrýginde suıytylǵan gaz saqtaıtyn jáne satatyn «Gaz Standart System» JShS-niń jumysymen de tanysty. Óndiriste Shymkent qalasy, Atyraý jáne Qyzylorda oblystyq munaı óńdeý zaýyttarynyń shıkizaty qoldanylady. Oblys ákimi sapar barysynda kásiporynnyń ishki naryqty qamtamasyz etý múmkindigin zerdelep, birqatar tapsyrma júktedi. Ómirzaq Estaıulyna aýdandyq kommýnaldyq salada atqarylyp jatqan jumystar men 12 eldi mekendi tabıǵı gazben qamtý máseleleri tanystyryldy.
