Túrkistan oblysynda poshtashy zeınetkerlerdiń aqshasyn qaltasyna basqan

TÚRKІSTAN. QazAqparat - Túrkistan oblysynda «Qazposhta» qyzmetkeri zeınetkerlerdiń aqshasyn ıemdenip ketken. Tergeý barysynda kúdiktiniń úsh qart kisige shyǵyn keltirgeni anyqtalyp otyr, dep habarlaıdy QazAqparat tilshisi.

Oblystyq PD málimetinshe, aqshasyn ala almaı júrgen zeınetkerler polıtsııaǵa aryzdanǵan.

«Jábirlenýshiler zeınetaqysyn «Qazposhta» qyzmetkeri arqyly óz úılerinen alyp otyrǵan. Ótken jyldyń jeltoqsan aıynda poshta qyzmetkeri qart kisilerdiń 250 myń teńge kóleminde zeınetaqysyn ıemdenip ketken. Ol jaratyp qoıǵan aqshany qaıtarýǵa ýáde bergenimen, sózinde turmaǵan» delingen habarlamada.

Atalǵan jaıt boıynsha Qylmystyq kodekstiń 189-baby («Senip tapsyrylǵan bóten múlikti ıemdenip alý nemese talan-tarajǵa salý») negizinde is qozǵaldy. Qazir aqsha jaratyp qoıǵan áıelge qatysty sotqa deıingi tergep-tekserý sharalary júrip jatyr.