Túrkistan oblysynda qoıan ósirýdi kásip etken aq jaýlyqty ana turady
Búginde onyń aýlasynda 40-qa jýyq qoıan bar. Keıýana kúndelikti tańerteń tura salysymen qoraǵa qaraı qadam basyp, olardyń as-sýyn ázirlep, jem-shóbin beredi. Turaqtaryn tazalaıdy. Sharýashylyqtyń jumysymen júrip, kúnniń qalaı ótkenin de umytyp ketedi.
«Ótken jyly qoıandarymnyń sany 100-den asyp ketti. Aýlaǵa syımaı qaldy. Sodan alǵashqyda Astana, Almatydaǵy tanystarǵa tegin taratyp berdim. Keıinnen bir kelisin 3 000 teńgeden satýǵa qoıdym. Kópshilik talasyp-tarmasyp alyp ketti», - deıdi Shárıpa Ábdijapparqyzy.
Qoıan jyly qarsańynda satyp alǵysy kelip habarlasqan klıentteri kóbeıipti. Jerlesterinen bólek, alys-jaqyn qalalardan habarlasyp, telefonyna tynyshtyq bermeı jatqanyn aıtady. Degenmen, Shárıpa Ábdijapparqyzy olardyń barlyǵyna «satylatyn qoıan joq» dep jaýap berip otyr.
«Qazir qoıandardy satýǵa shyǵaryp jatqan joqpyn. Qaıta qoldaǵy 40 qoıanymdy kóbeıtýdi kózdep otyrmyn. Qańtar aıynyń 5-ine qaraı birazy kójekteýi qajet. Sol sátti asyǵa kútip júrmin. Qoıandar bir týǵanda 4-5, tipti 8-ge deıin kójekti ómirge alyp keledi. Olarǵa arnaıy tor jasap, kútim kórsetemin», - deıdi sharýa.
Qazir Sharıpa Ábishtiń aýlasynda qoıannyń «kolıfornııa», «frantsýz qoıy» sekildi túrleri bar. Sondaı-aq, ózi qoldan býdandastyryp shyǵarǵan «mıks» atty túri de ósip keledi. Bir qoıannyń salmaǵy 6-8 kelige deıin jetedi. Sharýa olarǵa tek sapaly ónim berip, semirtedi.
«Torda otyrǵandaryn kórip, keıde janym ashyp ketedi. Sodan tamaqty kóp berip qoıamyn. Kóbinese jońyshqa jáne júgeri, suly, arpa aralasqan jem jeıdi», - deıdi ol.
Jalpy, Shárıpa Ábishtiń qorasynda qoıannan bólek, 40 orys eshkisi men 60-qa jýyq taýyq bar. Aq jaýlyqty ana olardyń barshasyna bir ózi qaraıdy. Tańerteń as-sýyn bergen soń, qoralardy tazartady. Eshkilerdiń sútin saýyp, taýyqtardyń jumyrtqasyn terip alady. Zeınetkerdiń úıinen shyqqan ónimge suranys ta joǵary. Tipti, aldyn ala habarasyp, tapsyrys berip qoıatyn turaqty tutynýshylary da bar.
«Qoıandar men eshkiler óte taza keledi. Tamaqty da tańdap jeıdi. Óte momyn. Eshkiniń súti, qoıannyń eti – em. Sondyqtan, satyp alýshylar kóp», - deıdi sharýa.
Sharıpa Ábdijapparqyzy áleýmettik jelilerdegi chattarǵa qosylyp alǵan. Olardan qoıandy qalaı baptaý kerek, kóbeıtý joldary, eshkilerdi ósirý, taýyqtan mol jumyrtqa alý sekildi túrli keńesterdi oqyp otyrady. Sondaı-aq, sol chattar arqyly qajetti dárýmender men dári-dármegin, jem-shóbin satyp alady. Ózge de sharýalarmen tájirıbe almasyp, pikirilesedi.
«Ózimniń súıikti isim bolǵandyqtan sharshamaımyn. Qaıta demalamyn. Búginge deıin memlekettik qyzmette jáne jeke fırmalarda eńbek ettim. Jańatasta, Shymkentte turdyq. Tipti, otbasylyq jaǵdaımen Ombymen shekaralas aımaqta da eki-úsh jyldaı ómir súrdik. Keıinnen týǵan jerge oralyp, kásip bastaýdy qup kórdim. Sodan osy sharýashylyqty qolǵa aldym. Alǵashqyda jylqy, sıyr, qoı ósirdik. Degenmen, bizge eń tıimdisi qoıan, eshki men taýyq ósirý boldy. Qazir Allaǵa shúkir, óz kásibimizden nesibimezdi alyp otyrmyz», - deıdi sharýa.
