Túrkistan oblysynda dári-dármek baǵasyn qymbattatqan dárihanalar jazalanady

TÚRKІSTAN. QazAqparat – Túrkistan oblysynda dári-dármek baǵasyn shektik somadan qymbat satqan dárihanalarǵa shara qoldanylatyny eskertildi. Bul týraly Óńirlik kommýnıkatsııalar qyzmetinde ótken brıfıngte oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Dáýlet Taǵybaev málimdedi, dep habarlaıdy QazAqparat tilshisi.

Dáýlet Taǵybaevtyń aıtýynsha, óńirde pandemııaǵa baılanysty dári tapshylyǵy bolmas úshin arnaıy qordan qosymsha preparattar tasymaldanýda. Mamandar dárihanalardaǵy dári-dármektiń sany jetkilikti bolýyn ári baǵasynyń shektik somadan aspaýyn qadaǵalap otyr. Qazirgi tańda oblys aýmaǵynda 924 dárihana turǵyndarǵa qyzmet kórsetetin bolsa, onyń ishinde tıisti talaptardy saqtamaǵan dárihanalarǵa shara qoldanylady.

«Dárilik zattardy taǵaıyndaý emhanalarda jáne kásibı mamandardyń nusqamasy negizinde júrgiziledi. Antıbıotık dárilik zattary bólshek saýdada retseptsiz bosatylǵan jaǵdaıda, QR Ákimshilik quqyq buzýshylyqtyń 426-babynyń 1 tarmaǵyna sáıkes, ákimshilik shara qoldanylady. Qyzmet kórsetýshi tulǵaǵa 70 AEK, laýazymdy tulǵaǵa 100 AEK retinde, kishi kásipke 130 AEK, orta kásipke 200 AEK, iri kásipke 1000 AEK kóleminde aıyppul salynady. Osy atalǵan jaıt 1 jyl ishinde qaıtalansa, farmatsevtıkalyq qyzmetpen aınalysatyn kásipkerler 6 aıǵa deıin farmatsevtıkalyq qyzmetke lıtsenzııasy toqtatylady», - dedi Dáýlet Orynbaıuly.

Sonymen qatar, dári-dármek baǵasyn shektik baǵadan asyrǵan dárihanana ıelerine de shara qoldanylmaq. Shektik baǵany kez kelgen azamat androıd jelisinde «dariKZ» mobıldi qosymshasyn júkteý arqyly bólshek saýdada satylatyn nemese bosatylatyn dárilik zattardyń shekti baǵasyn baqylaýǵa múmkindigi bar.

Eger baǵa shekti somadan asyp ketse, túbirtegin alyp, zań aıasynda aryzdanýǵa bolady.

«Oblys ortalyǵynda pnevmonııa syrqatynyń kóbeıýine baılanysty qala ákimdigi tarapynan arnaıy jumysshy top qurylyp, departamenttiń farmatsevtıkalyq qyzmetti baqylaý bóliminiń mamandarymen birlesip, bólshek saýdadaǵy dári-dármekterdiń baǵalaryna monıtorıng júrgiziledi. Monıtorıngtik top bólshek saýdamen aınalysatyn dárihanalarda bosatylatyn dárilik zattardyń baǵalaryn negizsiz kóterý deregin anyqtaǵan jaǵdaıda, qorytyndy usyna alady. Usynylǵan qorytyndyǵa sáıkes, zań sheńberinde tıisti sharalar qabyldanady», - dedi departament basshysynyń orynbasary.