Túrkistan oblysynda «Aıbary myqty Ata Zań» merekelik sharasy ótti
Jergilikti bılik ókilderi men máslıhat depýtattary, oblystyq basqarmalar men quqyq qorǵaý organdarynyń basshylary, ardagerler alqasy men zııaly qaýym ókilderi, ÚEU músheleri men stýdent jastar, BAQ ókilderi qatysqan jıynda óner ujymdary men ánshiler kontserttik baǵdarlama usynyp, patrıottyq ánder shyrqaldy. Túrkistan oblysynyń ákimi Janseıit Túımebaev kópshilikti merekemen quttyqtady.
«Konstıtýtsııa - myzǵymas memleketimizdiń altyn qazyǵy. Birligi men yntymaǵy jarasqan eldigimizdiń buljymas baǵdary, kemel keleshegimizdiń kepili! Búgingi jıynymyzdyń máni tereń ekendigin atap aıtýǵa tıispiz. Óıtkeni Elbasy bastamasymen óńirimizde tarıhı tyń betburys jasalyp, bıylǵy mereke memlekettiń taǵdyrynda mańyzdy ortalyqqa aınalǵan Túrkistanda ótip otyr. Eki ǵasyrdan astam ýaqyt Uly dala dástúrin dáriptep, «Jeti jarǵysy» jazylǵan qasıetti Túrkistannyń orny Qazaq eli úshin erekshe. Endeshe, tamyry «Jeti jarǵydan» tartylǵan Ata zańymyzdyń aıbyny asqaqtaı bersin!»,- dedi óńir basshysy. 
Janseıit Qanseıituly shara barysynda eńbegimen úzdik atanǵan bir top azamatqa Gramota men Alǵys hat tapsyrdy. Sharada óńirdiń teatr ujymdary men dombyrashylary, bı ansamblderinen quralǵan 150-den asa ónerpaz «Ata zań», «Uly Dala zańy», «Dala danalyǵy» sazdy-horeografııalyq kompozıtsııasyn usyndy.