Túrkistan oblysynda 8 provızorlyq gospıtal pnevmonııamen aýyrǵan naýqastardan bosady

TÚRKІSTAN. QazAqparat – Túrkistan oblysynyń 8 aýdanynda ashylǵan provızorlyq gospıtalder pnevmonııamen aýyrǵan naýqastardan bosady. Sozaq, Tólebı, Báıdibek, Saıram, Ordabasy, Shardara, Maqtaaral aýdandary men Myrzakent eldi mekenininiń jáne Leńgir qalasynyń provızorlyq gospıtalderinen pnevmonııaǵa shaldyqqan barlyq naýqas jazylyp shyqqan, dep habarlaıdy QazAqparat tilshisi.

Qazir atalǵan emdeý mekemelerindegi provızorlyq tósek-oryndar bos tur.

Oǵan qosa, indettiń órshýine baılanysty qosymsha provızorlyq gospıtaldary ashylǵan oblystyq balalar aýrýhanasy men teri-venerologııalyq ortalyǵy men perzenthanalarda da qazir pnevmonııamen em qabyldap jatqan naýqastar joq.

Oblystyq qoǵamdyq densaýlyq saqtaý basqarmasynyń málimetinshe, jalpy ınfektsııalyq jáne provızorlyq tósek-oryndardyń 70 paıyzdan astamy bosaǵan.

Atap aıtqanda, ınfektsııalyq stantsıonarlarda 225 orynnyń 152-de naýqas joq. Provızorlyq stantsıonarlardaǵy 1000 tósek-orynnyń 129-da ǵana naýqas em qabyldaýda. Qalǵan tósek-oryndar da bosap qalǵan.

Soǵan qaramastan aýrýhanalardaǵy medıtsına qyzmetkerleri daıyndyǵyn pysyqtap, qosymsha tósek qory únemi daıyn turady.