Túrkistan oblysynda 50-den astam turǵynnyń talap-tilegi tyńdaldy
Qabyldaýǵa 23 basqarmanyń basshysy jáne jaýapty ókilderi qatysyp, turǵyndardyń aryz-ótinishterin tyńdady. Óńirdiń ár aýdan-qalalarynan kelgen 50-den astam turǵyn oblystyq basqarma basshylarmen tikeleı júzdesip, aryz-shaǵymdaryn aıtty. Bul jolǵy jappaı qabyldaýǵa ásirese, áleýmettik kómek kórsetý, jumyspen qamtý, medıtsına, bilim jáne turǵyn úı-kommýnaldyq sharýashylyq salasyna qatysty basqarma ókilderine suraqtar óte kóp boldy. Qabyldaýǵa jazylǵan turǵyndardyń basym bóligi osy túıtkilder boıynsha aryzdanǵan.
Búgingi qabyldaý qortyndysy boıynsha birneshe otbasy «Qamqorlyq» jobasynyń tizimine qosylýy múmkin. Qoǵamdyq qabyldaýda keıbir turǵyndardyń máselesin birden sheshý joly usynylsa, birqataryna zań aıasynda keńes berildi. Árbir másele men shaǵymdy basqarma ókilderi arnaıy jazyp aldy. Aldaǵy ýaqytta bul shaǵymdar boıynsha jumys atqarylyp, sheshim qabyldanbaq.
Aıta keteıik, búginde Nur Otan partııasy Túrkistan oblystyq fılıalynyń «Open Spase» formatyndaǵy qoǵamdyq qabyldaý bólmesi naǵyz dıalog alańyna aınalyp keledi. Partııa Tóraǵasy, Elbasy Nursultan Nazarbaevtyń partııany jańǵyrtý baǵytyndaǵy tapsyrmasyna sáıkes munda apta boıy qabyldaý ótkizilip júr. Aldaǵy ýaqytta shalǵaıdaǵy aýdandarda kóshpeli qoǵamdyq qabyldaýdy da turaqty ótkizý josparlanyp otyr.
«Partııanyń qoǵamdyq qabyldaý bólmesi halyq pen bıliktiń arasyn baılanystyryp otyr. Osy maqsatta arnaıy keste ázirlenip, basshylardyń qabyldaý kúnderi aldyn ala habarlanyp jatyr. Búgingi qoǵamdyq qabyldaýǵa da turǵyndar kelip, tıisti jaýabyn alýda. Mundaı jappaı ashyq esik kúni 7 aqpanda saǵat 15.00-de Shymkent qalasynda da ótedi. Túrkistanǵa kele almaǵan oblys turǵyndary sol qabyldaýǵa barsa bolady», – deıdi Nur Otan partııasy Túrkistan oblystyq fılıaly tóraǵasynyń birinshi orynbasary Beısen Tájibaev.
