Túrkistan oblysynda 50-den astam kásiporyn ashylyp jatyr

NUR-SULTAN. QazAqparat – Túrkistan oblysynda óndiris salasyn qaıta qurý jumystary júrgiziledi. Bul týraly óńir ákimi Ómirzaq Shókeev aıtyp berdi, dep habarlaıdy QazAqparat tilshisi.

«Sońǵy 3 jylda oblys ekonomıkasyna ınvestıtsııa 1,4 trln bolyp, 5 esege ósti. Jalpy, oblys qurylǵaly beri quny 396 mlrd teńgege 6 300 jumys ornyn ashylyp, 114 ınvestıtsııalyq joba iske qosyldy. Ónerkásip salasyna kelsek, oblys bolyp qaıta qurylǵan kezde, ónerkásip salasyndaǵy kásiporyndardyń basym bóligi Shymkent qalasynda qalyp qoıdy. Sondyqtan bizdiń basty maqsatymyz oblysta óndiris salasyn qaıta qurý boldy. Oblystyń ónerkásiptik áleýetin damytý maqsatynda jeke ınvestıtsııa tartýǵa kóńil bólinedi», - dedi Ó. Shókeev Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, óńirdegi basty ınvestıtsııalyq jobalar arasynda «Sastóbe» hımııalyq kesheni», munaı óńdeý zaýyty, fosfor kenderin óńdeý zaýyty, turmystyq tehnıka óndirisi, natrıı tsıanıdin óndiretin zaýyt jáne kómir-hımııa kombınaty bar.

«Budan bólek, qazirgi ýaqytta ónerkásip salasynda 62 mlrd teńge bolatyn, 4000 jumys ornyn quraıtyn 50-den astam kásiporyn ashylyp jatyr. Búgingi tańda, ónerkásip óniminiń kólemi 530 mlrd teńgege jetip, ótken jyldyń tıisti kezeńnen artyǵymen oryndaldy», - dedi Ó. Shókeev.

Buǵan deıin Ó. Shókeev Táýelsizdik jyldary Túrkistan oblysynda iske asyrylǵan mańyzdy jobalar týraly aıtqan edi.