Túrkistan oblysy: aýyl ákimine úmitkerlerdiń 170-si ózin-ózi usynsa, 89-y saıası partııalar atynan

TÚRKІSTAN. QazAqparat - Túrkistan oblysynda aýdandyq, qalalyq aýmaqtyq saılaý komıssııalarynyń sheshimderimen 181 aýyl okrýginiń 60-da jańa formattaǵy tikeleı saılaý ótedi. Bul týraly Túrkistan oblystyq aýmaqtyq saılaý komıssııasynyń tóraǵasy Álibek Ómirálıev málimdedi.

Onyń aıtýynsha, aýyl okrýginiń ákimdigine oblystaǵy tirkelgen ár saıası partııalardan bir úmitkerden usynylsa, ózin-ózi usynatyn úmitkerlerge shekteý qoıylmaǵan.

«Saılaý kezinde óńirlerde 242 ýchaske jumys isteıdi. Saılaýǵa jalpy 262 500 daýys berýshi qatysady dep kútilýde. Saılaý kezinde oblystaǵy barlyq ýchaskelerinde karantındik talaptar qatań saqtalatyn bolady. Aýyl ákimdigine usynylý merzimi aǵymdaǵy jyldyń 26 maýsymda bastalyp, 9 shildede saǵat 18:00-de aıaqtalǵan bolatyn. Qazirge deıin jalpy 285 úmitker tirkelse, olardyń talaptarǵa sáıkestikteri tekserilgen soń 252 úmitker qalǵan», - dedi oblystyq aýmaqtyq saılaý komıssııasynyń tóraǵasy.