Túrkistan: Keles aýdanynda 5,6 mlrd teńge ınvestıtsııa tartylǵan

TÚRKІSTAN.QazAqparat - Túrkistan oblysy, Keles aýdanynda 5 mlrd 646 mln teńgeniń ınvestıtsııasy tartylǵan. Óndirilgen jalpy ónim kólemi 46,9 mlrd teńgege jetken, dep habarlaıdy QazAqparat tilshisi.

Oblystyq ákimdiktiń baspasóz qyzmeti málimetinshe, aǵymdaǵy jyly jańadan qurylǵan aýdanda ónim kólemin 62,3 mlrd teńgege jetkizip, 132,8 paıyzǵa arttyrý josparlanýda. Al, shaǵyn jáne orta sýbektiler sanyn 7,4 myńǵa nemese ótken jylmen salystyrǵanda 107,2 paıyzǵa ósirý kózdelgen. Nátıjesinde osy sýbektilerde jumys isteıtin adamdar sany 15 400 adamǵa jetip, 124,9 paıyzǵa artatyn bolady.

Budan ózge, «Indýstrıaldy ınnovatsııalyq damý» baǵdarlamasy boıynsha jalpy quny 327,4 mln teńgeni quraıtyn 2 ınvestıtsııalyq joba kásipkerlik qoldaý kartasyna engizildi. Sondaı-aq, jalpy quny 411 mln teńgeni quraıtyn 2 ınvestıtsııalyq joba kásipkerlik qoldaý kartasyna usynylǵan.

Aýdanda ótken jyly quny 250 mln teńge bolatyn 1 joba iske asyrylyp, 30 jumys orny ashylǵan. Bıyl quny 738,4 mln teńgeni quraıtyn 4 joba qolǵa alynyp, jergilikti 135 adam turaqty jumyspen qamtylmaq.

Sonymen qatar, Abaı aýylynyń egjeı-tegjeı josparlaý jobasynda ındýstrıaldyq aımaqtyń qurylysy úshin 32,1 jer teliminiń ınfraqurylymyn qalyptastyrýǵa tehnıkalyq-ekonomıkalyq negizdeme (TEO) ázirlenýde.

Aýdanǵa tartylǵan ınvestıtsııasynyń 2 mlrd 854 mln teńgesi respýblıkalyq bıýdjet, 1 mlrd 422 mln teńgesi jergilikti bıýdjet, 1 mlrd 369 mln teńgesi menshik qarajat esebinen bolyp otyr. Budan ózge, 2019 jyly aýdanǵa 6 mlrd 2 mln teńgeniń ınvestıtsııasyn tartý josparlanýda.