Túrki keńesiniń Densaýlyq saqtaý mınıstrleri medıtsına salasynda yntymaqtastyq tobyn qurýǵa kelisti
Shara 10 sáýirdegi Túrki keńesiniń kezekten tys sammıti barysynda memleket basshylary qabyldaǵan sheshimderdiń oryndalýyna arnalǵan.
Kezdesýge Túrki keńesiniń qazirgi tóraǵasy Ázerbaıjannyń Densaýlyq saqtaý mınıstri Oktaı Shıralıev, Túrki keńesiniń Bas hatshysy Baǵdad Ámireev, Qazaqstannyń Densaýlyq saqtaý mınıstri Eljan Birtanov, Túrkııanyń Densaýlyq saqtaý mınıstri Fahrettın Koja, Ózbekstannyń Densaýlyq saqtaý mınıstri Álisher Shadmanov, Qyrǵyzstannyń Densaýlyq saqtaý mınıstriniń orynbasary Nurbolot Úsenbaev, Majarstannyń Densaýlyq saqtaý jónindegi memlekettik hatshysy Zoltan Lorınchı jáne Dúnıejúzilik densaýlyq saqtaý uıymynyń Eýropa boıynsha aımaqtyq dırektory Hans Anrı Klýge qatysty.
Densaýlyq saqtaý mınıstrleri COVID-19-men kúrestegi jáne pandemııadan keıingi kezeńde Túrki keńesi sheńberindegi yntymaqtastyqtyń mańyzdylyǵyn atap ótti.
Otyrysta aqparatpen tájirıbe almasý jáne profılaktıkalyq ádister, dıagnoz qoıý, qaýipti ınfektsııalardy emdeý, epıdemıologııalyq jáne ǵylymı zertteýler úshin kópjaqty yntymaqtastyq tetikterin qurý týraly sheshim qabyldandy. Mınıstrler taraptardyń medıtsınalyq qyzmetkerleri arasynda birlesken tehnıkalyq kezdesýler men mamandar daıyndaý baǵdarlamalaryn ótkizýge kelisti.
Sonymen qatar, mınıstrler densaýlyq saqtaý ınfraqurylymyna birlesken ınvestıtsııalardyń, atap aıtqanda test jıyntyqtary, maskalar, farmatsevtıka, vaktsına oılap tabý qajetti zerthanalyq medıtsınalyq jabdyqtardyń óndirý máselelerin talqylady. Osyǵan baılanysty, taraptar joǵaryda atalǵan salalardaǵy yntymaqtastyq úshin «Jetkizilim tizbegi tobyn» qurýǵa kelisti. Mınıstrler sondaı-aq, jaqyn arada joǵaryda atalǵan zattardy shyǵarý boıynsha memlekettik jáne jeke kompanııalar arasynda yntymaqtastyq ornatýǵa arnalǵan arnaıy bıznes forým ótkizýge kelisti.
Bas hatshy Baǵdad Ámireev óz sózinde mınıstrlerdi Túrki keńesi Prezıdentteriniń 2020 jylǵy 10 sáýirde ótken tótenshe sammıtiniń sheshimderi týraly habardar etip sáýirdiń aıaǵy men mamyrdyń basynda josparlanǵan Túrki keńesi múshe memleketteriniń kólik, ekonomıka, saýda, aqparattyq jáne kommýnıkatsııalyq tehnologııalar (AKT) mınıstrleriniń jáne kóshi-qon qyzmetteri basshylarynyń vıdeokonferentsııalarynyń kún tártibi týraly aqparat berdi.
Bas hatshy múshe memleketterdiń tıisti mekemeleri arasyndaǵy ózara is-qımyl men úılestirý jumysyn arttyrý maqsatynda yntymaqtastyqtyń kópjaqty tetikterin qurý týraly pikirlerin aıtty.
B.Ámireev densaýlyq saqtaý jáne birlesken medıtsınalyq jáne zerthanalyq jabdyqtaryn shyǵarý, sondaı-aq farmatsevtıkalyq ónimder men vaktsınalar óndirý salasyndaǵy birlesken óndiris oryndaryn qurý jaıly usynys jasady.
Bas hatshy, Túrki memleketteriniń basshylarynyń sheshimderine sáıkes, uıymnyń pandemııadan keıingi kezeńde de, birlesken kúsh-jigerdi úılestirý máseleleri boıynsha jáne densaýlyq saqtaý mınıstrleriniń kezdesýde qol jetken kelisimderdiń oryndaý úshin qajetti sharalardy qabyldaıtynyn aıtty.
