Túrki ǵalymdary TWESCO altyn medalimen marapattaldy

ASTANA. QazAqparat - Halyqaralyq Túrki akademııasy (TWESCO) uıymdastyrǵan «Uly Dala» ІІІ Gýmanıtarlyq ǵylymdar forýmynda túrki álemi ǵylymynyń damýyna úles qosyp júrgen birqatar elderdiń ǵalymdary altyn medalmen marapattaldy, dep habarlaıdy QazAqparat tilshisi.

Arnaıy medaldar túrki álemi ǵylymynyń damýyna, túrkologııaǵa orasan úles qosqan tanymal tulǵalar úshin taǵaıyndalǵan. Halyqaralyq Túrki akademııasy túrki dúnıesiniń bilim men ǵylymnyń damýyna, sonymen qatar yntymaqtastyqty nyǵaıtýǵa zor úles qosqan tanymal tulǵalarǵa osylaı qurmet kórsetip otyr.

«Uly Dala» ІІІ Gýmanıtarlyq ǵylymdar forýmynda fılologııa ǵylymdarynyń doktory, professor, Reseı Ǵylymdar akademııasynyń Ýfa ǵylymı ortalyǵy Tarıh, til jáne ádebıet ınstıtýtynyń ǵylymı jetekshisi (Reseı, Bashqurstan) Fırdaýs Hısamıtdınovaǵa altyn medaldi Memlekettik hatshy Gúlshara Ábdiqalyqova tabys etti.

Sonymen qatar, altyn medalǵa fılologııa ǵylymdarynyń doktory, chývash tiliniń zertteýshisi, professor (Reseı, Chývashııa) Nıkolaı Egorov ıe boldy. Medaldi ol Mońǵolııa Ǵylym akademııasynyń prezıdenti Regdel Dúgerınniń qolynan aldy.

Sondaı-aq, altyn medal fılologııa ǵylymdarynyń doktory, professor, Reseı Ǵylymdar akademııasy, Tarıh-fılologııa ǵylymdary bólimine qarasty Túrkologtar komıteti tóraǵasynyń orynbasary Oleg Mýdrakqa tabystaldy. TWESCO-nyń altyn medalin tarıh ǵylymdarynyń doktory, professor Chýlýýn Sampıldandov ta ıelendi.

Eske sala ketsek, Astanada búgin Halyqaralyq Túrki akademııasy (TWESCO) uıymdastyrǵan «Uly Dala» ІІІ Gýmanıtarlyq ǵylymdar forýmy ótip jatyr. Bıylǵy forým «Uly Dala» ІІІ Astananyń 20 jyldyǵyna, sonymen qatar aqyn Maǵjan Jumabaevtyń 125, jazýshy Shyńǵys Aıtmatovtyń 90, Ázerbaıjan Halyq respýblıkasynyń 100, Tomsenniń Túrki jazýyn oqýynyń 125 jyldyǵyna arnalyp otyr.