Túrki elderi týrızmdi birlesip damytýdy qolǵa aldy

ASTANA. QazAqparat - Keshe Rixos Khadisha Shymkent qonaq úıiniń konferentsııa zalynda Túrik keńesiniń elderi - Túrkııa, Ázirbaıjan, Qyrǵyzstan jáne Qazaqstan memleketteriniń týrızm salasyndaǵy kompanııalarynan quralǵan jumys tobynyń VIІ otyrysy ótti, dep habarlaıdyń OQO ákimdiginiń baspasóz qyzmeti.

Jıynda «Jańa zamanǵy Jibek Joly» biryńǵaı týrıstik ónim baǵdarlamasyn qurý jaıy talqylanyp, onyń halyqaralyq týrıstik naryqta damý máselesi qaraldy.
Basqosýda atalǵan baǵdarlamanyń halyqaralyq áýe tasymalynyń quny eskerilgen tanystyrylymy ótip, Jibek jolynyń júregi sanalatyn Ońtústik Qazaqstan oblysynyń týrıstik áleýeti jaıly sóz boldy.
Túrki tildes elder keńesi hatshylyǵy tarapynan «Jańa zamanǵy Jibek joly» biryńǵaı týrıstik óniminiń marketıngtik strategııasynyń jol kartasynyń tusaý keseri jasaldy.
2016 jylǵy Túrik keńesi elderiniń qyzmet kórsetý sapasyn jaqsartý maqsatynda qatysýshy memleketterge Túrkııa Respýblıkasynyń mádenıet jáne týrızm mınıstrligi ázirlegen baǵdarlama kórsetildi.
Jıyn aıasynda «Ekspo-2017» kórmesi keńesshisiniń orynbasary Roza Asanbaeva halyqaralyq «Ekspo-2017» kórmesi kezinde poıyz-qonaq úıdiń Qazaqstan boıynsha ekskýrsııalyq týrynyń bastaý alatynyn aıtty.
Otyrys sońynda Túrik keńesi elderi týroperatorlarynyń konsortsıýmyn qurý týraly memorandýmǵa qol qoıyldy.