Túrki memleketteri tótenshe jaǵdaılarda birlese áreket etedi
ASTANA. KAZINFORM – Búgin Senattyń jalpy otyrysynda «Túrki memleketteri uıymynyń Azamattyq qorǵaý tetigin qurý týraly kelisimdi ratıfıkatsııalaý týraly» Zań maquldandy.
Túrki memleketteri uıymynyń Azamattyq qorǵaý tetigin qurý týraly kelisimge (TMUAQT) Bishkek qalasynda 2024 jylǵy 6 qarashada múshe memleketter men baıqaýshy memleketterdiń, sondaı-aq basqa da memleketterdiń aýmaǵynda týyndaýy múmkin dúleı zilzalalar men tótenshe jaǵdaılarǵa den qoıýdyń birlesken tetigin qurý maqsatynda qol qoıyldy.
Senattyń Halyqaralyq qatynastar, qorǵanys jáne qaýipsizdik komıtetiniń málimetine qaraǵanda, qujat apattar jaǵdaıynda Túrki memleketteriniń yntymaqtastyǵyn nyǵaıtýǵa baǵyttalǵan óziniń quqyqtyq sýbektisi bar halyqaralyq uıym qurýdy kózdeıdi. Tetiktiń negizgi fýnktsııalarynyń qataryna jedel den qoıý, adam ómiri men múlkin qutqarý, medıtsınalyq jáne gýmanıtarlyq kómek kórsetý,
sondaı-aq kásiptik daıarlyqtyń biryńǵaı standarttaryn ázirleý jáne birlesken oqý-jattyǵýlardy uıymdastyrý jatady. TMUAQT qyzmeti zardap shekken memlekettiń ótinishi boıynsha erikti negizde júzege asyrylady, al úshinshi elderge kómek kórsetý týraly sheshimder konsensýs negizinde qabyldanady.
- Atalǵan zańdy qabyldaý Qazaqstannyń túrki memleketterimen tótenshe jaǵdaılarǵa áreket etý salasyndaǵy yntymaqtastyǵyn nyǵaıtýǵa, halyqtyń qaýipsizdigin arttyrýǵa jáne tótenshe jaǵdaılarǵa daıyndyq deńgeıin kúsheıtýge múmkindik beredi. Jalpy alǵanda, Kelisimdi ratıfıkatsııalaý Qazaqstan Respýblıkasynyń ulttyq múddelerine tolyq sáıkes keledi jáne óńirlik qaýipsizdikti nyǵaıtýǵa óz úlesin qosady, - dedi senator Gennadıı Shıpovskıh.
Uıymnyń ákimshilik qurylymyna Mınıstrler keńesi (joǵary organ) jáne shtab-páteri Ystanbul qalasynda (Túrkııa Respýblıkasy) ornalasatyn Hatshylyq kiredi. Bas hatshyny Mınıstrler keńesi rotatsııalyq negizde úsh jyl merzimge taǵaıyndaıdy. Árbir tarap ózara is-qımyl jasaý úshin quzyretti organ taǵaıyndaıdy, Qazaqstan Respýblıkasynan osyndaı organ bolyp Tótenshe jaǵdaılar mınıstrligi aıqyndalǵan.
Sondaı-aq taraptardyń qarjylyq mindettemeleri kózdeledi: TMUAQT -nyń jyl saıynǵy mindetti tólemderden turatyn óz bıýdjeti bar. Jeke halyqaralyq bıýdjet sharty kúshine engenge deıin ár tarap úshin jyl saıynǵy sımvoldyq mindetti tólem 50 000 dollardy quraıdy. Bul rette tólemderdiń jalpy somasynan asatyn shyǵystardy Kelisim kúshine engen kúnnen bastap alǵashqy eki jyl boıy Túrkııa Respýblıkasy jabady.
Eske salsaq, Parlament Májilisi osy zańdy bıyl qańtar aıynda qabyldaǵan edi.