Túrki memleketteri adam resýrstaryn damytý máselelerin talqylady
ASTANA. KAZINFORM – Memlekettik qyzmet isteri agenttiginiń uıymdastyrýymen Túrki memleketteri uıymyna múshe memleketterdiń adam resýrstaryn damytý jónindegi ýákiletti organdar basshylarynyń úshinshi kezdesýi ótti.
Agenttik tóraǵasy Darhan Jazyqbaı jahandaný jáne jedel tehnologııalyq progress jaǵdaıynda ulttyq jáne halyqaralyq deńgeıdegi básekege qabilettiliktiń negizi – adam kapıtalyna erekshe kóńil bólýdiń mańyzdylyǵyna toqtaldy.
«Memleket basshysy Túrki memleketteri uıymynyń kezekten tys sammıtinde elderimiz saıası, ekonomıkalyq jáne mádenı yqpaldastyqty jańa deńgeıge kóterýi qajet dep aıtyp ótken bolatyn. Sondyqtan biz úshin Túrki áleminiń ekonomıkalyq, mádenı jáne áleýmettik salalardaǵy úılesimge umtylysyn eskere otyryp, memlekettik qyzmettegi HR salasynda da utymdy sharalar qabyldaýdyń mańyzy erekshe. Bizdiń maqsatymyz bir – ol memlekettik qyzmette adam resýrstaryn basqarýdyń kúshti ári úılesimdi júıesin qurý», - dedi Darhan Jazyqbaı.
Búginde Qazaqstanda memlekettik qyzmetti jańǵyrtýda HR quraldaryn qoldanýǵa basymdylyq berilip, talantty jastardy jáne jeke sektordan kásibı mamandardy tartýdyń jańa tetikteri engizilýde. Biliktiligi men salalyq tájirıbesine sáıkes kásibı mamandar men daryndy basqarýshylardy jekelegen joǵary laýazymdarǵa, al joǵary oqý oryndarynyń grantpen bitirgen úzdik túlekterin aýdandyq jáne aýyldyq deńgeıdegi laýazymdarǵa konkýrssyz taǵaıyndaý, «kelisimsharttyq qyzmetshi» retinde salalyq mamandardy naqty jobalardy iske asyrýǵa tartý múmkindikteri berilgen.
Tsıfrlyq transformatsııa aıasynda «e-Qyzmet» júıesinde iske qosylǵan memlekettik qyzmetke irikteýdiń jańa formaty Qazaqstan azamattaryna konkýrstarǵa onlaın túrde qatysýǵa jol ashty. Tsıfrlyq irikteý júıesin odan ári jetildirý maqsatynda jasandy ıntellekt quraldaryn qoldaný máselesi zerdelenip jatyr.
«Jıynǵa qatysýshylar óz kezeginde, Qazaqstannyń memlekettik qyzmetti jetildirý baǵytyndaǵy qadamdaryn oń baǵalap, ózgerister dáýirinde adamı kapıtaldy damytýǵa qatysty ózekti oılary men ozyq tájirıbelerin ortaǵa saldy. Ázerbaıjanda testileý quraldaryn keńinen qoldaný, Qyrǵyzstanda memlekettik qyzmetshilerdiń tsıfrlyq saýattylyǵyn arttyrý, Túrkııada úzdiksiz oqytý júıelerin ilgeriletý, Ózbekstanda baǵalaý tetikterin jańartý jumysy alǵa qoıylǵandyǵy aıtyldy. Kezdesý sońynda qatysýshylar búgingideı basqosýdyń memlekettik qyzmettegi adamı resýrstardy basqarý boıynsha tájirıbe almasýdaǵy jáne úzdik sheshimderdi ázirleýdegi mańyzyn erekshe atap, odan ári yntymaqtastyqty nyǵaıtýǵa nıetti ekenin bildirdi», - dep atap ótedi agenttikten.
Uıymǵa qatysýshy elderdiń memlekettik qyzmettegi adamı resýrstardy basqarý salasynda tájirıbe almasý jáne ózekti máselelerdi talqylaýǵa arnalǵan is-sharaǵa Memlekettik qyzmet isteri agenttiginiń tóraǵasy Darhan Jazyqbaı, Túrki memleketteri uıymynyń Bas hatshysy Kýbanychbek Omýralıev, Túrkııa Respýblıkasy Prezıdenti janyndaǵy Adamı resýrstardy basqarý keńsesiniń prezıdenti Salım Ataı, Ózbekstan Respýblıkasynyń Memlekettik qyzmetti damytý agenttiginiń dırektorynyń birinshi orynbasary Amırtemırhon Mýsaev, Ázerbaıjan Respýblıkasynyń Memlekettik emtıhan ortalyǵynyń dırektorlar keńesi tóraǵasynyń orynbasary Bahram Halılov, Ázerbaıjan Respýblıkasynyń Prezıdenti janyndaǵy Memlekettik basqarý akademııasynyń rektory Ýrhan Alakbarov, Qyrǵyz Respýblıkasynyń Prezıdenti janyndaǵy Memlekettik basqarý akademııasynyń prorektory Ýrmat Amanbaev, sondaı-aq ortalyq memlekettik organdardyń apparat basshylary qatysty.
