Týrızmdi damytam deseń ájethana sal: mınıstrlik máseleni qashan sheshedi
ASTANA. KAZINFORM — Búgin Úkimet otyrysynda otandyq týrızmdi damytý jáne tsıfrlandyrý máselesi qaraldy. Jıynnan keıin BAQ ókilderi avtojoldar boıyn jáne dalalyq jerlerdi ájethanamen qamtý máselesin kóterdi.
— Týrıstik baǵyttar boıyndaǵy ájethana tapshylyǵy bar, búginde 493 ájethana qajet bolǵan. Onyń kóbi ıaǵnı 300-den astamy búginde jol boıynda salyndy. Bul 2021 jyly «Kazakh Tourism» ulttyq kompanııasy júrgizgen aýdıt barysynda anyqtalǵan tapshylyq, kompanııa eldi aralap, osy defıtsıtti anyqtady. Odan bólek, jergilikti atqarýshy organdar tarapynan da sanıtarlyq-gıgıenalyq toraptar men jol boıyndaǵy qyzmet kórsetý nysandary salynyp jatyr. Olardyń sany birneshe júzge jetedi. Atalǵan nysandar ulttyq parkter aýmaǵy men ınjenerlik ınfraqurylym jetpegen shalǵaı aımaqtarda da boı kóterip jatyr. Olar jańa tehnologııamen jumys isteıdi. Máselen, Almatylyq ulttyq park aýmaǵynda frantsýz tehnologııasymen jabdyqtalǵan nysandar ornatylǵan, — dep jaýap berdi Týrızm jáne sport vıtse-mınıstri Erjan Erkinbaev jýrnalısterdiń saýalyna.
Osy oraıda vıtse-mınıstr qoljetimdi ájethana máselesin sheshýde Kólik mınıstrliginiń de biraz jumys istegenin aıtyp otyr.
— Vedomstvo bizben birlesip, respýblıkalyq mańyzy bar avtojoldar boıynda 1400-den astam jol boıyndaǵy servıstik nysandardy ulttyq standartqa saı keltirdi, osylaısha búginde olardyń 90%-y osy standartqa sáıkes. Jyl saıyn týrıstik ımıdjge keri áser etetin shamamen 100-ge jýyq eski ájethana alynyp tastalady. Kólik mınıstrligi jelisi boıynsha jyl saıyn 50-100 jańa sanıtarlyq nysan salynady. Jyl sońyna deıin sanıtarlyq-gıgıenalyq toraptary bar taǵy 25 jol boıy servıs nysanyn salý josparlanyp otyr, — deıdi ol.
Onyń aıtýynsha, atalǵan servıs túrimen aınalysatyn jeke kásipkerlerge árbir sanıtarlyq torap úshin aı saıyn 83 myń teńge mólsherinde qoldaý ótemaqysy tólenedi.
— Másele sheshilip jatyr. Árıne, elimiz keń baıtaq, bir jyldyń ishinde búkil jol boıyndaǵy ınfraqurylym men sanıtarlyq torap máselesin tolyq sheshý múmkin emes. Bul keıbir aýmaǵy shaǵyn elderde ǵana múmkin shyǵar. Biraq, biz durys baǵytta kelemiz, joldar boıynsha másele sheshildi, jol boıyndaǵy qyzmet kórsetý nysandary da rettelip qaldy. Endigi kezekte sanıtarlyq-gıgıenalyq toraptar máselesi de sheshiledi dep oılaımyn. Búginde kóptegen aımaqta, ásirese týrızmdi damytýǵa naqty jospar bar jerlerde, zamanaýı talaptarǵa saı jaǵdaılar jasalǵan. Al eger sanıtarlyq-gıgıenalyq toraptar týraly aıtatyn bolsaq, olardy salý, jergilikti atqarýshy organdardyń mindeti. Biz, árıne, baqylap, ınspektsııa jasap, qaı jerde jetispeıtinin, qaı jerde túrli sebeptermen jabyq turǵanyn kórsetip otyramyz. Keıde sý óship qalady, keıde qyzmetker jumysqa shyqpaıdy. Barlyq ájethananyń jaǵdaıyn Týrızm mınıstrligi jeke ózi qadaǵalaı almaıdy. Degenmen, jumys júrgizilip jatyr, dınamıka bar, — dep qorytyndylady Erjan Erkinbaev.
Buǵan deıin elimizde gıd mamandaryn daıarlaýy múmkin ekendigi týraly habarlaǵan edik.
Odan bólek, Týrızm jáne sport mınıstri elimizge kelip aldanyp qalatyn sheteldik týrıster máselesin sheshý joldaryn atady.
Aıta keteıik, elimizde týrısterge arnalǵan, jasandy ıntellektige negizdelgen TravelStan mobıldi qosymsha ázirlenedi.