Týrısterdiń súıikti mekeni Aqtolaǵaı borly taýynan munaı óndirile me
Aqtolaǵaı borly taýyna geologııalyq barlaý júrgiziletinin týroperator kesh estigen.
Tipti qoǵamdyq tyńdaýǵa qatysa almaǵanyn aıtyp, áleýmettik jelide óz narazylyǵyn bildirdi.
«8 tamyzda Mııaly aýylynda (Baıǵanın aýdany - red.) jıyn ótip ketken. Jıyn dep aıtý da qıyn negizi. 13 aqsaqaldy jınap alyp, anekdot aıtyp ótkizip tastaǵan nárse! Aýyl aqsaqaldaryn qalaı aldap turǵany belgisiz? Eshteńe ýáde bermeı-aq, aýyl turǵyndaryna jumys beremiz dep te aldamaı-aq, aqsaqaldar bir aýyzdan qoldaı ketti! Sony túsinbeı otyrmyn! Shań tozańnyń astynda, taza sýsyz, taza aýasyz, órissiz qalatyndaryn sezbeı de otyr! Bizdiń de aıtarymyz bar! Týrısttik nysandar zardap shekpeý kerek! Mıllondaǵan aqsha jumsalyp Aqtolaǵaıdyń ataǵyn shyǵarǵan eńbek qaıda ketedi? Muhıt asyp kelgen týrıstterdiń eńbegi esh kete ma?» dep jazdy Erkebulan Aımuratuly.
Aqtóbe oblystyq ındýstrıaldy-ınnovatsııalyq damý basqarmasy basshysynyń orynbasary Azamat Qudaıbergenovtiń aıtýynsha, barlaý jumystaryna ruqsatty QR Energetıka mınıstrligi beredi.
«Energetıka mınıstrligi aýktsıon ótkizgen. Talap boıynsha aldymen barlaý, zertteý jumysy júrgiziledi. Ol kezde 1 nemese 2 uńǵyma qazylady. Qory bar ma, joq pa - tekseredi. Qor bolsa, memlekettik qor tizimine engizedi. Bul da mınıstrlikke qaraıdy. Tizimge engen soń ǵana joba jasalady. Jaqyn jerdegi aýyldarǵa kelip, túsindirý, kezdesý sol kezde ǵana júrgiziledi. Aqtolaǵaı týraly aıtar bolsam, negizinen qorǵalatyn aýmaqqa kirýi kerek. Biraq bárin mınıstrlik aıtady»,- dedi Aqtóbe oblystyq ındýstrıaldy-ınnovatsııalyq damý basqarmasy basshysynyń orynbasary Azamat Qudaıbergenov.
Oqıǵanyń mán-jaıyn Aqtóbe oblystyq ekologııa departamenti de túsindirdi. Ázirge barlaý júretin aýmaqtyń erekshe qorǵalatyn terrıtorııaǵa qatysy bar-joǵy anyqtalady.
«Bul jumystyń jobasy bizdiń departamentte qaralyp jatyr. Ekologııalyq kodekstiń talaptaryna sáıkes, joba saraptamadan ótý kezinde qoǵamdyq tyńdaýdan ótedi. Tyńdaý kezinde bul jumystardyń erekshe qorǵalatyn aımaqqa kiretini jóninde aıtylǵan. Aqtolaǵaı erekshe qorǵalatyn aýmaqqa jatady. Biraq onyń shekarasyn tolyqqandy anyqtaý qajet. Sol sebepti tyńdaý qorytyndysy kezinde qandaı sheshim qabyldanǵanyna qaramastan Ekologııa departamenti jumystyń erekshe qorǵalatyn aýmaqqa kirip turǵany nemese ol aýmaqqa kirmeıtinin naqty anyqtap, dáleldi qujattaryn usynǵansha, jobany eskertýmen qaıtarý týraly sheshim qabyldanatyn bolady. Eger zańda kózdelgen ýaqytta tıisti qujattar usynylmasa, jobany júzege asyrýǵa tıym salamyz»,- dedi Aqtóbe oblystyq Ekologııa departamentiniń basshysy Erbol Qýanov.
Jergilikti ákimdik qazirgi kezde qoǵamdyq tyńdaý júrgizilgenin rastady. Tipti turǵyndar ótinish te aıtyp úlgergen.
Biri mektepke jóndeý qajettigin, ekinshisi jumysqa ornalasý máselesin qozǵady.
«Birinshiden, Mııaly aýylynda halyqpen kezdesken. 10 adamdy jumyspen qamtımyz dep aıtqan. Bul burǵylaý emes, barlaý jumysy. Sol kezdesýde árkim óz talabyn aıtqan. «Mekteptiń syrtyna kúrdeli jóndeý jasap berińizshi» degen eken, 18 mln teńge bólýge kelisken. Usynystar qoldaý tapqan. Ekinshiden, suranys tústi, biraq qabyldanǵan joq áli. Onyń ruqsatyn biz emes, mınıstrlik beredi. Ol Qoǵalaı degen jer. Aýyldan 40-45 shaqyrym qashyq. Aqtolaǵaıdan 80-90 shaqyrym qashyqta ornalasqan. Aqtolaǵaıda sý joq, jol joq. Ol jaqqa barmaıdy ǵoı»,- dedi Baıǵanın aýdany ákiminiń orynbasary Rústem Raýshanov.
Aıta keteıik, Aqtolaǵaı – borly taý. Týroperator Erkebulan Aımuratuly ony Aqtóbeniń brendine aınaldyryp úlgerdi.
Eń bıik tusy – 302 metr. Bir kúnde túsin birneshe ret ózgertedi.
Tańerteń sarǵysh, túste kúrishteı aq bolsa, keshke aspanǵa uqsap kókshil túske boıalady.
Munda tek qazaqstandyqtar emes, alys-jaqyn shetelden jabaıy tabıǵatty tamashalaıtyndar arnaıy keledi.
