Túrikmenstan Prezıdentiniń Qazaqstanǵa memlekettik sapary kútilip otyr

ASTANA. QazAqparat – Qazan aıynda Túrikmenstan Prezıdenti Serdar Berdimuhamedovtiń Qazaqstanǵa memlekettik sapary kútilip otyr, dep habarlaıdy QazAqparat Qazaqstannyń Syrtqy ister mınıstrligine silteme jasap.

QR SІM málimetine súıensek, Qazaqstan Syrtqy ister mınıstriniń orynbasary Ermuhambet Qonysbaev pen Túrikmenstan Syrtqy ister mınıstriniń orynbasary Vepa Hadjıevtiń tóraǵalyǵymen beınekonferentsııa formatynda qazaq-túrikmen saıası konsýltatsııalary ótti.

«Іs-shara aıasynda taraptar Qazaqstan men Túrikmenstan arasyndaǵy ekijaqty jáne kópjaqty formattarda yntymaqtastyqty odan ári damytýdyń jaı-kúıi men perspektıvalary týraly jan-jaqty pikir almasty.

Qazaqstan Respýblıkasynyń Prezıdenti Qasym-Jomart Toqaevtyń 2021 jylǵy qazandaǵy Ashǵabadqa memlekettik saparynyń qorytyndylary boıynsha qol jetkizilgen ýaǵdalastyqtardy iske asyrý jáne Túrikmenstan Prezıdenti Serdar Berdimuhamedovtiń 2022 jylǵy qazandaǵy Qazaqstanǵa memlekettik saparyna daıyndyqqa, sondaı-aq túrikmen tarapynyń 6-shy AÓSShK sammıtine, TMD memleketteri basshylarynyń keńesine jáne «Ortalyq Azııa - Reseı» sammıtine qatysýyna erekshe nazar aýdaryldy», - delingen habarlamada.

Konsýltatsııalardyń qorytyndysy boıynsha taraptar Qazaqstan men Túrikmenstan arasyndaǵy strategııalyq áriptestikti odan ári damytýǵa járdemdesý úshin eki memlekettiń syrtqy saıası vedomstvolary arasyndaǵy baılanystardyń joǵary deńgeıin qoldaýǵa ýaǵdalasqan.

Foto: tdh.gov.tm