Turǵyn úıdi jalǵa berý boıynsha 5 768 ótinim maquldandy – vıtse-mınıstr

NUR-SULTAN. QazAqparat – Memleket basshysynyń tapsyrmasyna oraı iske qosylǵan jalǵa beriletin turǵyn úıdi sýbsıdııalaý baǵdarlamasy boıynsha 5 768 ótinim maquldandy. Bul týraly Qostanaı oblysyna jasaǵan jumys sapary barysynda Indýstrııa jáne ınfraqurylymdyq damý vıtse-mınıstri Erkebulan Daýylbaev málimdedi, dep habarlaıdy QazAqparat vedomstvonyń baspasóz qyzmetine silteme jasap.

«Sońǵy 6 aıdaǵy ortasha jıyntyq tabysy otbasynyń árbir múshesine shaqqanda eń tómengi kúnkóris deńgeıinen aspaıtyn jáne baspana kezeginde turǵan azamattarǵa jeke turǵyn úı qorynan jalǵa berý mehanızmi engizildi. 2022 jylǵy 18 sáýirden bastap tsıfrlyq platforma arqyly ótinim qabyldaý bastalǵany belgili. Kúni búginge deıin kelip túsken 23 myńǵa jýyq ótinimniń 5 768-i maquldandy», – dedi Erkebulan Daýylbaev.

Sonymen qatar, vıtse-mınıstr memlekettik qoldaýǵa tórt sanat boıynsha baspana kezeginde turǵan qazaqstandyqtar ótinish bere alatyndyǵyn atap ótti. Olardyń qataryna І jáne ІІ toptaǵy múgedekter, múmkindigi shekteýli balalary bar nemese olardy tárbıelep otyrǵan otbasylar, jetim jáne ata-anasynyń qamqorlyǵynan aıyrylǵan balalar men kópbalaly otbasylar kiredi.

Aıta ketsek, bıyl Qostanaı oblysy boıynsha kezekte turǵan 1 193 azamat jaldaý tólemderi boıynsha memlekettik qoldaý alady dep josparlanǵan.