Turǵyn úı keshenderin jóndeý úshin nesıe alýǵa bolady

ASTANA. QazAqparat - QR Investıtsııalar jáne damý mınıstrliginde múlikti menshikteýshiler birlestiginiń jınaq esebindegi qarajattyń qalaı jumsalatyny týraly aıtyldy, dep habarlaıdy QazAqparat tilshisi.

Buǵan deıin Qazaqstanda turǵyn- úı kommýnaldyq sharýashylyǵyna qatysty zańǵa tıisti túzetýler engizilip, Májilis qaraýyna jiberiletini jáne jańa zań jobasy maquldanǵan jaǵdaıda Qazaqstannyń árbir turǵyn úı kesheniniń ózindik jınaq esebi bar múlikti menshikteýshiler birlestigi qurylatyny týraly aıtylǵan bolatyn. 

QR Investıtsııalar jáne damý mınıstrligine qarasty Qurylys salasyn jáne turǵyn-úı kommýnaldyq sharýashylyǵyn damytý departamentiniń dırektory Marǵulan Ábdikárimovtiń aıtýynsha, ekinshi deńgeıdegi bankterden ashylýy tıis birlestik esebindegi qarajat turǵyn-úı menshik ıeleriniń uzaqmerzimdi qajettilikteri úshin paıdalanylýy múmkin.

«Kúrdeli jóndeý jumystaryn júrgizý quny aımaqtarǵa baılanysty erekshelenedi. Bireýler 20 mln teńge jumsasa, bireýler jóndeý jumystaryn 5 mln teńgege júrgizedi.      Eger birlestik esebinde kúrdeli jóndeý jumystaryna qajetti qarajattyń 50%-y jınaqtalsa, onda qalǵan qarjyny bankten 3-4 paıyzben nesıe alýǵa bolady. Nesıe múlikti menshikteýshiler birlestigine beriledi», - dedi Marǵulan Ábdikárimov. 

Sonymen qatar, turǵyn-úı kommýnaldyq sharýashylyǵyn damytý departamentiniń basshysy, eger páterdi ıesi satqan jaǵdaıda jınalǵan qarajat pátermen birge qalatynyn aıtty. «Úıge kúrdeli jóndeý júrgizý úshin jınaqtalǵan qarajat, tek qana sol úı úshin jumsalatyn bolady. Jáne de  osy jerde turǵyn-úı ınspektsııasy jáne úıdiń turǵyndary qatystyrylyp, qarajattyń jumsalý barysyn qadaǵalaı alady», - dep túıindedi ol.