Turǵyndar shaǵymy: Almatyda eki kóshede kólik jyldamdyǵyna shekteý qoıylady

ALMATY. KAZINFORM – Almatynyń Dostyq dańǵyly men Kereı-Jánibek handar kóshelerine «Sergek» kameralary ornatylady. Osylaısha atalǵan kóshelerde jyldamdyqqa shekteý qoıylady. Bul týraly qala ákimi Erbolat Dosaev aıtty.

Almaty ákimi Erbolat Dosaevpen kezdesýge kelgen Medeý aýdanynyń turǵyny túngi ýaqytta halyqtyń tynyshtyǵyn buzatyn júrgizýshilerge qatysty shara qabyldaýdy surady.

«Túngi ýaqytta Dostyq kóshesinde jastar arasynda naǵyz jarys bastalady. Kólikterdiń dybysy, motordyń gúrili jáne qatty mýzyka uıyqtaýǵa kedergi keltiredi. Tynyshtyqty buzýshylarmen kúresýińizdi suraımyz», - dedi turǵyn.

Shahar basshysy, aýdan turǵyndarynyń shaǵymy eskeriletinin aıtty.

«Túngi tynyshtyqty buzǵandar jaýapkershilikten bosatylmaıdy. Polıtsııa departamenti ókilderimen birlesip, Dostyq dańǵyly, Kereı-Jánibek handar kóshesine «Sergek» beınekameralaryn ornatýdy tapsyrdym. Onda jyldamdyqqa shekteý qoıamyz. Beınebaqylaý kameralary bul jaǵdaıǵa áser etetinine senimdimin», - dedi Erbolat Dosaev.

Medeý aýdanynda qoǵamdyq qaýipsizdikti qamtamasyz etý maqsatynda 2023 jyly barlyǵy 57 «Sergek» apparattyq-baǵdarlamalyq kesheni ornatyldy. 

«Bıyl «Sergek» 30 apparattyq-baǵdarlamalyq kesheni men 750 beınemonıtorıng júıesiniń kamerasyn ornatý josparda»,- dep atap ótti ol.