Turǵyn úı baǵasy bir jylda qalaı ózgerdi
Bir jylda (2022 jylǵy jeltoqsan men 2023 jylǵy jeltoqsandy salystyrǵanda) jańa turǵyn úılerdi satý baǵasy 3,4% ósti, al páterlerdi qaıta satý baǵalary 3,7% tómendedi. Abattandyrylǵan turǵyn úıdi jalǵa alý tólemi 2022 jylǵy tıisti aımen salystyrǵanda 2023 jylǵy jeltoqsanda 1,6% joǵarylady. Bul týraly Ulttyq statıstıka bıýrosynyń baspasóz qyzmeti habarlady.
Óńirler bólinisinde jańa páterler naryǵynda jyldyq mánde baǵa Qyzylorda – 12,6% jáne Petropavl – 10,6% qalalarynda qymbattady. Qoldanystaǵy páterler naryǵynda baǵa ósiminiń kóshin Atyraý (8,2%), Qyzylorda (6,9%) qalalary bastap tursa, turǵyn úıdi jalǵa alý naryǵynda – Jezqazǵan (33,4%), Kókshetaý (26,1%), Qaraǵandy (23%) qalalary tur.
Bir aıdyń ishinde (2023 jylǵy jeltoqsan 2023 jylǵy qarashaǵa) abattandyrylǵan turǵyn úıdi jalǵa alý tólemi 0,9%, jańa turǵyn úıdi satý – 0,6%, páterlerdi qaıta satý – 0,2% ósti.
2023 jylǵy jeltoqsan aıynda turǵyn úıdi satyp alý-satý boıynsha 37 818 mámile tirkelgen, onyń ishinde jeke úıler boıynsha 8 238 jáne kóppáterli úılerdegi páterler boıynsha 29 580 mámile jasaldy. 2023 jyldyń qarashasymen salystyrǵanda (31 727) turǵyn úıdi satyp alý-satý mámileleriniń sany 19,2%-ǵa kóbeıdi. Mámileler sany boıynsha burynǵysynsha Almaty (7594 – 20,1%) jáne Astana (7157 – 18,9%) qalalary, sonymen qatar, Qaraǵandy oblysy (2946 – 7,8%) kósh bastap tur. Mámileler sany Ulytaý oblysynda eń az – 447 birlik (1,2%).
2023 jylǵy qarashamen salystyrǵanda jeltoqsanda eń joǵary ósim Astana (+48,2%), Túrkistan oblysynda (+44,1%) jáne Shymkent qalasynda (+30,5%) tirkeldi. Al bir aıdaǵy eń úlken tómendeý Soltústik Qazaqstan (24%), Aqmola (4,8%), sonymen qatar Qyzylorda (-4,6%) oblystarynda oryn aldy.
2023 jylǵy qarashaǵa qaraǵanda jeltoqsanda kóppáterli úılerdegi turǵyn úı mámileleriniń sany 22,5% (5432 mámilege) artty. Jeltoqsan aıynda páterler boıynsha barlyǵy 29 580 mámile jasaldy, bul mámilelerdiń jalpy sanynyń 78,2%. Kóppáterli úılerdegi turǵyn úı saýdasynyń negizgi úlesi Astana (23,7%), Almaty (23,5%) qalalaryna jáne Qaraǵandy oblysyna (8,2%) tıesili. Bólmeler sany boıynsha 2 bólmeli páterler satylymy basym, jeltoqsan aıynda olar boıynsha 11 465 mámile resimdelgen.
2023 jyldyń qarasha aıymen salystyrǵanda, jeltoqsanda jeke turǵyn úıler boıynsha da mámile sany kóbeıdi – 8,7% (659 mámilege) ósip, 8 238 qurady. Jeke turǵyn úıler boıynsha mámileler sanynyń eń kóp ósimi Almaty (39,7%), Shymkent (38,9%) jáne Astana (33,9%) qalalarynda baıqaldy. Al bir aıdaǵy eń úlken tómendeý Soltústik Qazaqstan (18,1%), Qostanaı (17,5%) jáne Aqtóbe (11,6%) oblystarynda oryn aldy.
2023 jyldyń jeltoqsanynda turǵyn úıdi satyp alý-satý mámileleri aldyńǵy jyldyń tıisti aıymen salystyrǵanda 12,6%-ǵa kóbeıgen, ol kezde 33 587 mámile resimdelgen bolatyn. Azaıýdyń eń joǵarǵy kórsetkishi Aqtóbe oblysynda (15,3%) tirkeldi, al Almaty oblysynda ulǵaıýdyń eń joǵary kórsetkishi (62,3%). Dınamıkanyń tómendeýi 2023j. qańtar-jeltoqsan aılaryndaǵy mámileler sanynyń 2022j. qańtar-jeltoqsan aılaryndaǵy mámileler sanymen salystyrǵanda azaıýy 20,5% kórsetti.
