Túpqaraǵan aýdanynda 2020 jyly 5 myń tonna qus etin óndiretin fabrıka ashylady
Qus fabrıkasynyń qurylysy 2017 jyly bastalǵan. Kásiporyn 4 alańnan turady. Inkýbatorlyq tseh, qus ǵımaraty, qus bordaqylaý orny, jem zaýyty. Búginde qurylystyń 20% ǵana qalǵan. Qajetti barlyq jabdyqtar da daıyn. Kásipker óz bastamasyn jalǵastyrýǵa «Agrarlyq nesıe» koorporatsııasynan nesıe alǵan. Sondaı-aq, qus fabrıkasynyń aýmaǵynda qoıma, garaj, ákimshilik ǵımarat jáne baqylaý-ótkizý pýnkti turǵyzyldy. Qazirgi ýaqytta ınjenerlik kommýnıkatsııalar men kirme joldar salynýda.
«Qus fabrıkamyzdyń jalpy quny 3 mlrd teńgeni qurap otyr. Onyń 30 paıyzy óz qarjymyz. Qalǵan 70 paıyzy «Agrarlyq nesıe» korporatsııasynan nesıe alyp, qazirgi tańda qarqyndy qurylys jumystaryn júrip jatyr. Bul oblysymyzdaǵy teńdesi joq joba. Barlyq qus et ónimderi syrttan kelip jatyr. Biz aldymen, ınkýbatorda jumyrtqadan balapan shyǵaryp, qus ǵımaratynda taýyqqa deıin ósirip, soıylǵannan keıin, daıyn ónimdi satýǵa shyǵaramyz. Taýyqqa arnalǵan jemdi ózimiz shyǵaramyz», - deıdi «Aqtaý agro» JShS dırektory Danııar Turǵynov.
50 gektar aýmaqta jalpy aýdany 17 myń sharshy metrdi quraıtyn 16 ǵımarat turǵyzylǵan. Balapan ósiriletin ǵımaratta 31 800 taýyq baǵylady. Munda balapan kúıinde ákelinip, taýyq bolǵansha ósiriledi. Al, bordaqylaý orny 4 gektar jerde jalpy alańy 556 sharshy metr aýmaqta ornalasqan. Munda taýyq ákelinip, tikeleı satylymǵa jiberiledi.
Fabrıkany 2020 jyldyń 2-toqsanynda ashý josparlanyp otyr. Montaj jumystary kelesi jyly bitedi. Danııar Turǵynovtyń aıtýynsha, ashylǵan kezde 120 adamdy jumyspen qamtý kózdeledi. Halyqqa muzdatylmaǵan qus eti jetkiziledi.
Azyqtandyrý zaýyty Munaıly aýdanynda ornalasqan. Jobalyq-smetalyq qujattama boıynsha qurylystyń quny 300 000 myń teńgeni quraıdy. Azyqtandyrý zaýytynyń qurylysy bastapqy kezeńde qalandy. «AKK» AQ nesıelik qarajaty esebinen zaýytqa arnalǵan jabdyq saǵatyna 10 tonna jarma nemese 20 tonna qıyrshyq jem shyǵarýdy josparlady. Jem tek óz qajettilikteri úshin ǵana emes, sonymen birge Mańǵystaý oblysynyń turǵyndaryna satylady.
Teńdessiz joba oblystyń aýyl sharýashylyǵyn damytýǵa súbeli úles qosady. Buǵan «Agrarlyq nesıe» koorporatsııasynyń da róli zor.
«Jalpy, elimizdiń azyq-túlik qaýipsizdigi strategııasy aıasynda «Argrarlyq nesıe» korporatsııasy «Aqtaý Agro» proektisin qarjylandyryp keledi. 1 mlrd-tan astam qarajat bólinedi. Jabdyqtar Iran, Qytaı, Túrkııadan keldi. Bul joba iske asqannan keıin ishki naryqty qus etimen 50 paıyzǵa deıin qamtıdy dep eseptep otyrmyz. 2018 jyly qurylǵan korporatsııasy osy ýaqytqa deıin 4 mlrd teńge qarajat quıdy. Osy ýaqytqa deıin 50 joba iske asty. Onyń ishinde mal sharýashylyǵy, egin sharýashylyǵy bar. 5 iri ınvestjoba bar. Túpqaraǵan aýdany, Aqshuqyr aýylyndaǵy ıspan tehnologııasymen sýarylatyn jylyjaıdy jáne qus fabrıkasyn atap aıtýǵa bolady. Jalpy, agrarlyq nesıe korporatsııasynan óńirge bólingen soma 2 mlrd-ty quraıdy. «Qarapaıym zattar ekonmıkasy» baǵdarlamasy arqyly azamattar taǵy nesıe ala alady», - deıdi MO AQ «Agrarlyq nesıe korporatsııasy» fılıalynyń dırektory Erbolat Ońǵarbek.
Agrarlyq nesıe korporatsııasy qarjylandyrǵan taǵy bir joba – «Sarman» sharýashylyǵy. «Qarapaıym zattar ekonomıkasy» baǵdarlamasy arqyly 5 paıyzben 7 jylǵa 70 mln teńge nesıe alǵan Jalǵasbek Sarman búginde túıe men jylqy baǵyp otyr.
«2005 jyly Túpqaraǵan aýdanynan jerdi jalǵa aldyq. Eń alǵashynda jylqy aldyq. 2012 jyly túıeni qostyq. Buıyrsa túıeni 18-den 88-ge arttyryp, sharýamdy keńeıtsem degen maqsatym bar. Bolashaqta shubat, balqaımaq, qurt shyǵaryp, qalaǵa tasymaldap, dúkenderge jetkizýdi josparlap otyrmyz. Qazirgi tańda qysqa shydamdy, júndi, etti narmaıa tuqymy ósirilip jatyr», - deıdi Jalǵasbek Sarman.
Sharýashylyq búginde shubatty Aqshuqyr aýylyndaǵy dúkenderge tapsyrady. Kúnine 20-30 lıtr aralyǵynda jetkizip otyrady. 2020 jyly jylqy sanyn da arttyryp, etin satyp, saýmalyn da shyǵarýdy josparlap otyr.
