Týnıste prezıdent saılaýy 6 qazanda ótedi
ASTANA. KAZINFORM – 2019 jyldan beri bılikte bolǵan prezıdent Kaıs Saıd seısenbi kúni Týnıste prezıdenttik saılaý 6 qazanda ótetinin jarııalady. Bul týraly france24 saıty jazdy.
Onyń qaıta saılaýǵa túsý-túspeýi ázirge belgisiz.
Kaıs Saıd 2021 jyly premer-mınıstri men parlamenti otstavkaǵa ketkennen keıin jarlyqpen eldi tolyq baqylaýǵa aldy, al onyń kóptegen qarsylasy qazir temir tordyń ar jaǵynda otyr.
2022 jyly referendýmda eldiń jańa konstıtýtsııasy qabyldanǵanyn aıta keteıik.
«Respýblıka Prezıdenti búgin, 2024 jylǵy 2 shildede saılaýshylardy jeksenbi, 2024 jylǵy 6 qazanda ótetin prezıdenttik saılaýǵa shaqyrý týraly jarlyq shyǵardy», - delingen Saıd keńsesiniń habarlamasynda.
Onyń bılikti basyp alýynan týyndaǵan saıası daǵdarys Týnıs ekonomıkasyna aýyr zardap ákeldi, jumyssyzdyq 15 paıyzdy qurap, eldegi 12 mln adamnyń 4 mıllıonǵa jýyǵy kedeıshilikte ómir súrip jatyr.
Týnıs Ulttyq jýrnalıster odaǵynyń málimetinshe, BAQ-ty basyp-janshý saldarynan 60-tan astam tilshi, zańger jáne saıası qarsylas qylmystyq jaýapkershilikke tartylǵan.
