Týnıs jaǵalaýynda mıgranttar mingen eki qaıyq sýǵa batty

TÝNIS. ANADOLY - QazAqparat- Týnıstiń ońtústik jaǵalaýynda bir táýlikte mıgranttar mingen eki qaıyq sýǵa batty: tórt adam qaza taýyp, 20-dan astamy iz-túzsiz joǵaldy. Bul týraly Anadoly agenttigine silteme jasap QazAqparat habarlaıdy.

Sfaks qalalyq sotynyń ókili Fevzı Mesmýdı jýrnalısterge málim etkendeı, qaıyqtarda Afrıka elderiniń mıgranttary bolǵan.

Onyń aıtýynsha, qaıyqtardyń biri Sfaks qalasynan 35 mıl jerde sýǵa ketken, 17 adam qutqaryldy.
«20 mıgrant iz-túzsiz joǵaldy. Іzdestirý-qutqarý jumystary jalǵasyp jatyr», - dedi sot ókili.
Ekinshi qaıyqta 43 zańsyz mıgrant bolǵan, 36-sy qutqaryldy, tórteýiniń denesin qutqarýshylar sýdan shyǵardy, úsheýi iz-túzsiz joǵalǵandar tiziminde.
Jyl saıyn Afrıkadan myńdaǵan zańsyz mıgrant jaqsy ómir izdep Týnıske keledi. Maqsaty – Jerorta teńizi arqyly Eýropaǵa jetý.

Týnıstegi bosqyndar kvartalynda turatyn keıbir mıgranttar Eýropaǵa jetedi, kópshiligi teńizde qaza tabady.