Tuńǵysh ret ShYU sammıti astanasynyń tanystyrylymy ótti

 BEIJІŃ. QazAqparat - Shanhaı yntymaqtastyq uıymynyń shtab-páterinde 14 sáýir kúni «Astana - ShYU sammıtiniń jáne EKSPO-2017 halyqaralyq mamandandyrylǵan kórmesiniń astanasy» atty beınetanystyrylymy men fotokórmesi ótti, dep habarlaıdy «QazAqparat» HAA-niń Qytaıdaǵy menshikti tilshisi.

Shara ShYU men QR Qytaıdaǵy elshiligi tarapynan uıymdastyryldy. Oǵan Beıjińde jumys saparymen júrgen Astana ákimi Áset Isekeshev pen ShYU-na múshe elderdiń dıplomattary qatysty.

 

«Biz búgin ShYU sammıtin qabyldaıtyn, tóraǵalyq etýshi eldiń astanasynyń tanystyrylymyn jasap otyrmyz. Biz úshin bul óte bir erekshe oqıǵa. Al aldyda bizdi tarıhı oqıǵa kútip turǵanyn eske alsaq, onyń ereksheligi odan saıyn arta túsedi. Úndistan men Pákistan Shanhaı yntymaqtastyq uıymyna baıqaýshy retinde 12 jyl buryn tap osy Astanada qabyldanyp edi. Bıylǵy jyly baıqaýshy eki el halyqaralyq uıymnyń tolyqqandy múshesi bolady degen úmittemiz»,-dedi ShYU-nyń Bas hatshysy Rashıd Alımov.

 
Ol sózinde ótken aptada Astanada bolǵandyǵyn eske saldy.

«Men Astanan qyzyqty, ásem de, ylǵı jylyshyraı tanytyp turatyn qala ekendigin ashyq aıtqym keledi. Ony bizdiń planetamyzdaǵy memleketterdiń astanalarynyń arasyndaǵy marjany deýge bolady»,-dep atap ótti dıplomat.

Óziniń sózinde elorda ákimi Áset Isekeshev Astananyń ShYU sammıti men EKSPO-2017 kórmesine daıyndyǵy týraly aıtty. Al Qazaqstannyń Qytaıdaǵy elshisi Sh.Nuryshev bolsa, Qazaqstannyń ShYU-na tóraǵalyǵy týraly sóz qozǵady.