Tuńǵysh ınvestordyń taǵylymy - baspasózge sholý
«Egemen Qazaqstan» gazetiniń búgingi sany túgeldeı derlik Astana taqyrybyna arnalǵan deýge bolady. Birinshi bette «Alǵa, Astana» degen taqyryppen keshe Prezıdent Nursultan Nazarbaevtyń qatysýymen ótken «Astana» prezıdenttik kásipqoı klýbynyń ashylý rásimi týraly maqala berilgen. Gazet Elbasy N. Nazarbaevtyń «Astana - Qazaqstan damýynyń shamshyraǵy. Elimiz tek ekonomıkada ǵana emes, sportta da zor jetistikterge qol jetkizdi. Buǵan London Olımpıadasynda 7 altyn medal, 205 eldiń ishinen 12 oryn alǵanymyz dálel. Biz búgin sporttyń barlyq túrin jan-jaqty damytýǵa den qoıyp otyrmyz. Ásirese, buqaralyq sportty, jalpy sport ındýstrııasyn ilgeriletý basty nazarymyzda tur. Búgingi shara - memlekettiń osy salaǵa qamqorlyǵynyń aıshyqty aıǵaǵy» degen sózderin keltire kele, «Kelesi kezekte Nursultan Nazarbaev klýbtyń Qazaqstannyń bas qalasymen attas bolýynda ózindik nyshan bar ekenine nazar aýdardy. Muny ol jańa klýb maqsatynyń elordada burynnan úrdiske aınalǵan salamatty ómir saltyna úndes keletindigimen túsindirdi. Memleket basshysy «Qazaqstan-2050» Strategııasynda tabysty bolashaǵymyzdyń negizi ult densaýlyǵy ekenin atap ótken edi. Demek, «Astana» kásibı sport klýbynyń qurylýy da osy múddemen oraılas bolmaq», - dep oı túıindeıdi.
Al ekinshi bette «Aımaqtardy arshyndatqan Astananyń adymy» atty ortaq taqyryppen gazet oqyrmandarynyń Astana týraly oılary toptastyrylyp, aıqara betke berilip otyr.
«Tuńǵysh Prezıdent Nursultan Nazarbaevtyń shaqyrýymen táýelsizdiktiń alǵashqy jyldarynda el ekonomıkasyna shetel ınvestıtsııasyn salǵan alǵashqylardyń biri - «Shevron» korporatsııasy», - dep jazady basylym «Ekonomıka» aıdary boıynsha berilgen «Tuńǵysh ınvestordyń taǵylymy» atty maqalada.
Álemdik munaı bıznesindegi alyptardyń birinen sanalatyn halyqaralyq iri kompanııanyń qatysýymen elimizde 1993 jyly «Teńizshevroıl» birlesken kásiporny qurylyp, kómirsýtekti shıkizattyq qorymen álemde teńdesi joq «Teńiz» kenishi ıgerile bastady. «Shevronnyń» Qazaqstanmen seriktestigi tek munymen shektelmeıdi. Bul kompanııa Qarashyǵanaq kenishin ıgerýge de, Qara teńiz jaǵalaýyna tóteleı tartylǵan munaı qubyrynyń iske qosylýyna da qomaqty ınvestıtsııa saldy.
«Qara altynnyń» qaınary atqylaǵaly beri Atyraý jurtshylyǵy onyń qadirin sezinbek túgili, dál búgingideıdi kórgen emes. Keńestik júıeniń qatal tártibimen óndirilgen munaı men gaz ortaq qazanǵa quıylyp jatatyn. Munaıshylar vagon-úıshikterde turyp, eski tehnologııany jamap-jasqap ónim óndiretin. Teńizdeı telegeı qazynanyń ústinde otyrǵan Atyraý qalasynyń turǵyndary qara balshyqty keship júretin. Al aýyldarda turatyn áıelder shelektep sý tasyp, mal tezegimen, kómirmen pesh jylytatyn. Dál búgin sonyń bári kórgen tústeı, qala turǵyndaryn aıtpaǵanda, alystaǵy aýyldardaǵylar da órkenıetke qol sozdy. Aýyldarǵa da taza aýyz sý da, «kógildir otyn» da jetti. Balabaqshalar, mektepter men densaýlyq saqtaý nysandary el ıgiligine berildi. Otandyq munaı-gaz ónerkásibiniń kenishterinde qonaq úıge bergisiz jataqhanalar men ashanalar boı kóterdi. Munaı óndirý salasynda jańa tehnologııalar engizildi. Otandyq munaıshylar biliktiligi artty», - dep jazady gazet.
***
Aqan seriniń kórkem beınesin jasap, sol arqyly Qazaq eliniń úlken tragedııasyn qatar kórsete bilgen qalamger, Qazaqstannyń halyq jazýshysy, memlekettik syılyqtyń ıegeri - Sáken Júnisovti halqy «Sáken seri» dep atap ketti. Bul týraly «Aıqyn» gazetiniń búgingi sanynda jazylǵan.
«Qazaq dalasyna esimi ańyz bolyp taraǵan Aqan serini ánshi, aqyn ǵana emes, qazaq qamyn oılaǵan kúresker retinde tanytqan sýretkerge laıyq teńeý. Jaqynda jazýshynyń inisi, búginde derekti fılmderimen tanylyp júrgen belgili rejısser Oral Júnisovpen kezdesýdiń sáti túsip, áńgimelesip qaıttyq. Áserli áńgimeniń tıegin aǵytqan rejısser aǵasynyń qarapaıym aýyl balasynan halqy syılaǵan serige qalaı aınalǵanyn baıandap berdi...», - delingen maqalada.
«Qazirgi kúni halyqtyń seri jaıly túsinigi ózgergen. Dombyrada án aıtyp, qyzdarmen kóp júretin jigittiń barlyǵyn «seri» ataıtyn bolypty. Negizi, seriliktiń ólshemi bul emes. «Seri» dep ádette «segiz qyrly, bir syrly» jigitterdi aıtady. Sákenniń mundaı qyrlary kóp boldy. Birinshiden, aǵam kúreske qatysyp, sport sheberi atanǵan. Ekinshiden, ándi keremet aıtatyn. Otyrystarda, jıyn, toılarda án tıegin aǵytqan Sákendi jurt qulaqqa urǵan tanadaı, bar ynta-shyntasymen tyńdaıtyn. Tipti bir kezderi osy ónerge qyzyǵyp, konservatorııa ustazdarynan jeke sabaq alǵan. Ondaǵy maqsaty - ádemi ándi durys aıtyp, úırený bolatyn. Dombyra ishegin birese kúldirip, birese kúńirentetin kúıshilik qasıeti de joq emes. Bir otyrysta Nurǵısamen kúı jarystyrǵany esimde. Ekeýi kúı tartysyp biraz otyrdy. Qandary qyzý emes pe, tartysty dodaǵa kirisip-aq ketipti. Ekeýiniń bul saıysynan biz yńǵaısyzdana bastadyq. Óıtkeni ekeýinde de ájepteýir minez bar emes pe?! Arty úlken shataq bolatyn shyǵar dep, únsiz tyńdap otyrmyz. Dáýlesker kúıshi aǵamnyń des bermeı otyrǵanyn kórip, bir kezde dombyrany bashpaıymen tartty. Sonda ǵana bul «tartys» aıaqtaldy. «Saıys» toqtaǵan soń ekeýi ádettegideı arqa-jarqa sóılesip, qaljyńdasyp, dastarqan basyna ketti. Biz ań-tańbyz. Sóıtsek, bul eki talanttyń talasy emes eken. Kerisinshe, birin-biri moıyndaýy eken ǵoı. Qarapaıym dostyq ráýishtegi ádemi ázil», - dep jazady avtor.
Maqalada Sáken Júnisovtiń tulǵasy jan-jaqty ashyla kelip, «kóshe aty qashan beriler eken?» degen másele de kóteriledi. «Sákenniń esimine Almatydan bir kósheniń atyn berýge kúsh salyp júrmin. Osy máseleni kóterip, qajetti mekemelerden surastyrǵanymda dúnıeden ozǵanyna bes jyl tolýy kerek degen. Bes jyl ótti, 7 jylǵa ketti. Biraq áli de eshqandaı ózgeris joq. Biraq ultyn súıgen ulyna halqy bir kóshesin arnaıtyny anyq», - degen oıyn aıtady O. Júnisov.
