Túnde Jambyl oblysynda úsik júredi – Qazgıdromet

ASTANA. KAZINFORM – «Qazgıdromet» RMK baspasóz hatshysy Alına Ismagýlova 29 sáýirge arnalǵan aýa raıy boljamyn usyndy.

«Atmosferalyq frontaldy bólikterdiń yqpalymen elimizdiń basym bóliginde kún qubylmaly bolady, naızaǵaı oınap, jańbyr jaýady, ońtústik-shyǵystyń taýly aımaqtarynda jańbyr men qar jaýady. Tek elimizdiń ońtústik-batysyna, soltústik-batysynda, ortalyǵyna antıtsıklon jotasy áserinen kún jaýyn-shashynsyz bolady», - dedi spıker Ortalyq kommýnıkatsııalar qyzmetinde.

Respýblıka boıynsha jel kúsheıip, eldiń batysy men soltústiginde burshaq jaýady, ońtústik-batysy men ońtústiginde daýyl, shańdy daýyl turady, ońtústik-shyǵysynda tuman túsedi.

«Túnde Jambyl oblysynyń shyǵysynda, taýly aýdandarynda 2 gradýs úsik júredi. Mańǵystaý oblysynyń basym bóliginde, Qyzylorda oblysynyń ortalyǵynda, ońtústiginde, Túrkistan oblysynyń soltústiginde, Atyraý oblysynyń ońtústiginde, Jetisý oblysynyń soltústiginde, Abaı, Qaraǵandy oblystarynyń ońtústiginde joǵary órt qaýpi saqtalady», - dedi A. Ismagýlova.