Tumaý aýrýy júkti áıeldiń densaýlyǵyna nesimen qaýipti
Júktilik - áıel ómirindegi erekshe kezeń. Bul kezde densaýlyqqa erekshe nazar aýdarǵan jón. Bul týraly Almaty qalalyq №2 perınataldyq ortalyqtyń akýsher-gınekology Gúlnar Kúrenova aıtyp berdi, dep habarlaıdy Kazinform.
Dárigerdiń sózinshe júkti áıel jiti respıratorlyq aýrýlardyń biri – tumaýmen aýrýy múmkin.
"Tumaý áıeldiń júktilik kezinde náresteniń densaýlyǵyna jaǵymsyz áser etedi. Bolashaq ana demikpe ne qant dıabeti sııaqty sozylmaly aýrýlarmen aýyrsa, tumaý kezinde onyń densaýlyǵynyń asqyný qaýpi joǵary. Tumaý merziminen buryn bosanýǵa, gestatsııalyq qant dıabetine, pnevmonııaǵa, ókpeniń qabynýyna jáne basqa da asqynýǵa ákelýi yqtımal. Sonymen qatar, tumaý anadan balaǵa jatyrda berilýi múmkin, bul uryqta qaǵanaq sýynyń azdyǵy, gıpotrofııa jáne merziminen buryn bosaný sııaqty asqyný qaýpine ákeledi", - deıdi dáriger.
Jańa týǵan nárestege tumaý tıse, pnevmonııa, ımmýnıtettiń tómendeýi sııaqty aýyr asqynýǵa, tipti ólimge ákelýi múmkin. Bolashaq anada ınfektsııany boldyrmaý jáne tumaýdy ýaqtyly emdeý aýrýdyń uryqqa juqtyrý qaýpin tómendete túsedi.
"Tumaýdyń aldyn alý ádisteriniń biri - tumaýǵa qarsy ekpe kómektesedi. Ol júkti áıeldi tumaýdan jáne onyń asqynýynan qorǵaýdyń tıimdi ádisterdiń biri. Vaktsına ana men balaǵa ımmýnıtetti qamtamasyz etedi jáne júktilik kezinde qaýipsiz bolady. Degenmen, ekpe jasamas buryn muny dárigermen talqylap, keńes alý kerek», – dedi Gúlnar Kúrenova.
Dáriger tumaýdyń alǵashqy belgilerinde-aq dereý dárigermen keńesip, tumaýdy der kezinde emdeýge keńes beredi, bul uryqtyń aýrýdy juqtyrý qaýpin tómendete túsedi.
"Júkti áıel tumaý ınfektsııasynyń aldyn alý úshin barlyq saqtyq sharany qabyldaý kerek. Buǵan qoldy únemi jýý, aýrý adamdarmen jaqyn aralaspaý, betperde kııý, adam kóp jınalatyn jerlerden aýlaq bolý, taza aýada kóp bolý jáne durys tamaqtaný kiredi", - dep atap ótti akýsher-gınekology Gúlnar Kúrenova.
