Tumandy Albıondaǵy Olımpıadada gımnastıka sportynan Qazaqstan namysyn 3 sportshy qorǵaıtyn boldy
«QazAqparat» agenttigi dástúrli túrde aptanyń ár jeksenbisinde osy aıtýly sporttyq sharada Qazaqstannyń namysyn qorǵaıtyn sportshylardy tanystyrýdy jalǵastyrady. Osy joly biz oqyrman qaýymyn Olımpıada oıyndarynda sporttyq gımnastıkadan jáne kórkem gımnastıkadan synǵa túsetinderdi tanystyrmaqpyz.
Aıta keteıik, sporttyq gımnastıkadan Londonǵa baratyn eki sportshymyzdy tanystyrý barysynda sporttyq gımnastıkadan memlekettik jattyqtyrýshy Lıýdmıla Revınanyń pikirin kópshilik nazaryna usynamyz.
Sonymen, Tumandy Albıonda elimizdiń namysyn qorǵaıtyn gımnastardyń biri - Móldir Ázimbaı. 1995 jyly 2 jeltoqsanda dúnıege kelgen ol qazirgi kezde Ońtústik Qazaqstan gýmanıtarlyq-ekonomıkalyq kolledjinde tálim alýda. Móldir atalǵan sport túri boıynsha 2004 jyldan beri eńbegi sińgen jattyqtyrýshy Galına Dolgopolovanyń jetekshiliginde jattyǵyp júr. 2010 jyly Sıngapýrdegi I jazǵy jasóspirimder Olımpıadasyna qatysqan, sondaı-aq ol elimizdiń birneshe dúrkin chempıony jáne júldegeri atanǵan. Kóptegen halyqaralyq týrnırlerdiń jeńimpazy. Kotbýs qalasynda ótken Álem Kýbogy úshin jarystyń qatysýshysy, Qazaqstan halyqtary ІІІ Spartakıadasynyń jeńimpazy, Japonııada ótken Álem chempıonatynyń qatysýshysy. M. Ázimbaı Londonda ótetin Olımpıada oıyndaryna joldamany Ulybrıtanııada ótken lıtsenzııalyq jarysta enshiledi.
«Men ony eńbekqor dep atar edim. Bar kúsh-jigerin salyp, tyrysyp jattyǵady. Atap aıtqanda, Móldir Qazaqstannyń sporttyq gımnastıkasynyń tarıhynda Olımpıada oıyndarynda osy sport túrinen jarysqa qatysatyn birinshi qazaq qyzy»,-dep atap ótti sporttyq gımnastıkadan memlekettik jattyqtyrýshy Lıýdmıla Revına.
Sporttyq gımnastıkadan joldamany enshilegen taǵy bir sańlaǵymyz - Stepan Gorbachev. Ol 1983 jyly 2 qazanda Qaraǵandy oblysynyń Temirtaý qalasynda dúnıege keldi. 14 jasynan bastap Almatyda jattyǵyp júr. Búginde 28 jastaǵy Stepannyń bas jattyqtyrýshy Ernar Erimbetov. Halyqaralyq sanattaǵy sport sheberi S. Gorbachev Qazaq sport jáne týrızm akademııasyn támamdaǵan. Joldamany Londondaǵy testilik jarystarda jeńip aldy.
Lıýdmıla Revına: «Kópsaıystan birneshe ret QR Chempıony atanǵan. Álem Kýboginiń, Azııa oıyndarynyń fınalısi. Erkin jattyǵýdan Dúnıejúzilik ýnıversıadanyń kúmis júldegeri. Óte jigerli, kúshti, tártipti sportshy. Ózine júktelip otyrǵan barsha jaýapkershilikti túsinip otyr»,- dep túıindedi óz pikirin.
Al kórkem gımnastıkadan Qazaqstan namysyn Anna Alıabeva qorǵaıtyn bolady. Ol 1993 jyly 19 qarashada Shymkent qalasynda týǵan. Kórkem gımnastıkamen ol 5 jasynan bastap aınalysyp keledi. Annany búginde Álııa Júsipova jattyqtyryp júr. Ol Álem kýboginiń birneshe kezeńderi men túrli halyqaralyq jarystardyń jeńimpazy. Gýanchjoýdaǵy HVІ Azııa oıyndarynda ol kórkem gımnastıkadan jeke jarystarda altyn medalin jeńip aldy. 2009 jyly jáne 2011 jyly Azııa chempıony atandy.
Aıta keteıik, sporttyq gımnastıka Olımpıada oıyndarynyń baǵdarlamasyna 1896 jyly endi, 1928 jyldan bastap bul ataýly dodaǵa áıelder de qatysa bastady. Al kórkem gımnastıka saıystaryna tek áıelder ǵana qatysa alady. Kórkem gımnastıkanyń sporttyq gımnastıkadan bir aıyrmashylyǵy, mánerli qımyldarmen erekshelenedi. Onda sportshynyń áýenge ilesip bı elementterin oryndaýy nazarǵa alynady. Halyqaralyq gımnastıka federatsııasy kórkem gımnastıkany sporttyń túri retinde tek 1962 jyly tirkedi. Bul gımnastıka túrinen alǵashqy jarystar 1930 jyldary ótkizilgen bolatyn. Olımpıada baǵdarlamasyna kórkem gımnastıka 1984 jyly Los-Anjeleste engizildi.
