Týberkýlezge shaldyqqan adamnyń aǵzasy basqa adamǵa salynýy múmkin - Jaqsylyq Dosqalıev
Astana men Almaty, Shymkent, Aqtóbedegi transplantatsııa ortalyǵyna ortaq bir problema bar. Máıittik donor sany tym az, al kezek kútip otyrǵandar sany aı saıyn ósip keledi. Sondyqtan ortalyq «Halyq densaýlyǵy jáne densaýlyq saqtaý júıesi týraly» Kodekske ózgertýler men tolyqtyrýlar engizip, juqpaly derti, sozylmaly aýrýy bar adamdardyń da aǵzasyn paıdalanýǵa ruqsat surap otyr. ıAǵnı, máıittik donordy tıimdi paıdalanyp, juqpaly aýrýlardy emdeý jolyn qarastyrý usynyldy.
«Elimizde transplantatsııa damyp jatyr. Biraq máıittik donor tapshy. Birinshiden, 100 donor anyqtalsa, onyń 70 paıyzynyń aǵzasy jaramsyz bolyp shyǵady. Bıyl 42 máıit zerttelse, sodan tek toǵyz adamnyń aǵzasy alyndy. Ózgesi ınfektsııa bolǵan soń alynbady. VS gepatıtteri, sıfılıs, týberkýlez anyqtaldy. Zań boıynsha biz ol adamdardyń aǵzasyn alyp, kezek kútip jatqan adamǵa sala almaımyz. Damyǵan elder mundaı aǵzany alyp-salýǵa múmkindik beredi. Keler jyldan bastap biz de osy ádisti qoldanýymyz múmkin. Zań qazir Parlamentte talqylanyp jatyr», - dedi transplantolog Jaqsylyq Dosqalıev.
Statıstıkalyq málimetke súıensek, qazirgi kúni elimizde 2250 adam - búırek, 450 adam - baýyr, 150-ge jýyq adam - júrek aýystyrý otasyn kútip júr. Al 10-ǵa jýyq adam jasandy tynys alý apparatyna qosýly jatyr. Olarǵa ókpe aýystyrý qajet.
«Halyq densaýlyǵy jáne densaýlyq saqtaý júıesi týraly» Kodekske balalardyń aǵzasyn aýystyrý týraly ózgertýler men tolyqtyrýlar engizilýi múmkin. Qazir mundaı otany memleket ózge elge tapsyrys berip, jasatyp júr.
«Balalarǵa da máıittik donordy paıdalanýdy kózdep otyrmyz. Qazaqstanda búırek, baýyr, júrek aýystyrýdy qajet etetin balalar bar. Qazirgi kezde salmaǵy 5 keliden asatyn balalardyń aǵzasyn aýystyrý otasy elimizde jasalyp júr. Ózgesin shetelde jasatady», - dedi Jaqsylyq Dosqalıev.