Tsıfrlyq transformatsııa boıynsha top quryldy

ASTANA.KAZINFORM – Premer-mınıstr Oljas Bektenov Memleket basshysynyń jasandy ıntellektini damytý jónindegi tapsyrmalaryn júzege asyrý máseleleri boıynsha jıyn ótkizdi. Bul týraly Úkimettiń baspasóz qyzmeti habarlady. 

Onda Prezıdent belgilegen negizgi toǵyz baǵyt qarastyryldy. Olardyń qatarynda ekonomıkanyń naqty sektoryna, memlekettik basqarýǵa, densaýlyq saqtaý salalaryna JI engizý, Jasandy ıntellekt jáne tsıfrlyq transformatsııa strategııasyn ázirleý, memlekettik qyzmetterdi jáne ótinishtermen jumys isteý protsesterin damytý, ІT-arhıtektýrany, QazTech ulttyq platformasyn jańǵyrtý, kıberqaýipsizdikti qamtamasyz etý, otandyq IT startaptardy qoldaý jáne Smart sity-di damytý máseleleri bar.

Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Prezıdent tapsyrmalaryn júzege asyrýdaǵy tásilder týraly baıandama jasady.

Onyń aıtýynsha, ekonomıkaǵa jasandy ıntellektini engizý basym mindet bolyp otyr. Osy baǵytta Úkimet «Samuryq-Qazyna» UÁQ-pen birlesip, eńbek ónimdiligin arttyrý úshin óndiristik protsesterge JI engizý jónindegi jol kartasyn ázirleýge kiristi.

Jańa tehnologııalar densaýlyq saqtaý salasynda durys dıagnoz qoıýǵa, em-shara taǵaıyndaýǵa jáne naýqastarǵa monıtorıng júrgizýge, dárigerlerdi kúndelikti mindetterden bosatýǵa múmkindik beredi. Bul halyqqa kórsetiletin qyzmetterdiń sapasyna, ashyqtyǵy men tıimdiligine oń áser etedi.

Otandyq startaptardyń Densaýlyq saqtaý mınıstrliginiń ınfraqurylymyna qoljetimdiligi, Biryńǵaı medıtsınalyq derekter bazasyna kóshýi jáne taǵy basqalary — mańyzdy qadam.

Memlekettik qyzmetter salasynda Aitu-dy ulttyq messendjer retinde bekitý jumystary júrgizilýde. Memlekettik organdar Aitu-ǵa kóshirilip, ekojúıeniń negizgi qatysýshylary biryńǵaı tsıfrlyq ortaǵa biriktiriledi. Bul tásil zamanaýı, qaýipsiz ári yńǵaıly tsıfrlyq ortany qalyptastyrýǵa múmkindik beredi, onda memlekettik qyzmetter árbir azamatqa «batyrmany bir ret basý» arqyly qoljetimdi bolady. Sonymen qatar elimizdiń IT landshaftynyń arhıtektýralyq úılesimdiligin arttyrý, sondaı-aq derekterdi qorǵaý jáne kıberqaýipsizdik salasynda sharalar kesheni boıynsha júıeli jumystar kózdelgen.

— Memleket basshysy JI tehnologııalaryn barlyq salaǵa engizýdiń ózekti máselelerine basa nazar aýdaryp otyr. Bul máseleler jyldam ári ózara tyǵyz áreket ete otyryp sheshý qajet. Mundaǵy másele tek JI jumysynyń quqyqtyq negizin jetildirýmen shektelmeıdi, odan bólek derekterdiń shashyrańqylyǵy, sýperkompıýterdiń qýatyn bólý boıynsha naqty reglamenttiń bolmaýy, kıberqaýipsizdik, QazTech platformasyna tolyq kóshý syndy máseleler sheshimin tabý kerek. Bul mindetterdiń barlyǵy elimizdiń tsıfrlyq transformatsııasy úshin strategııalyq mańyzǵa ıe, sondyqtan da kórinetin ekonomıkalyq tıimdilikpen osy jyldyń jeltoqsan aıyna deıin oryndalýy tıis, — dep atap ótti Premer-mınıstr Oljas Bektenov.

Tsıfrlyq damý mınıstrligine múddeli memlekettik organdarmen jáne uıymdarmen birlese otyryp, usynylǵan tásilderdi pysyqtaý tapsyryldy. Úkimet jaqyn arada naqty merzimderi men nátıjeleri bar is-sharalar josparyn qabyldaıdy.

JI-di jedel damytý jáne ekonomıkaǵa engizý, sondaı-aq Memleket basshysy tapsyrmalarynyń júzege asyrylýyn baqylaý maqsatynda Premer-mınıstrdiń ókimimen tsıfrlyq transformatsııa jónindegi top (tsıfrlyq shtab) quryldy.

Premer-mınıstr tóraǵalyq etetin tsıfrlyq shtab quramyna: Premer-mınıstrdiń orynbasary — Úkimet Apparatynyń basshysy, Strategııalyq josparlaý jáne reformalar jónindegi agenttiktiń tóraǵasy, tsıfrlyq damý, ınnovatsııalar jáne aeroǵarysh ónerkásibi mınıstri, Prezıdenttiń tsıfrlandyrý máseleleri jónindegi keńesshisi kirdi.

Tsıfrlyq shtabtyń mindetti sheshimderdi jyldam qabyldaýy jasandy ıntellekt tehnologııalaryn jedel ári jappaı engizýge yqpal etedi.

Aıta ketelik Úkimet basshysy «Adal azamat» baǵdarlamasyn iske asyrý josparyn bekitýdi tapsyrdy.