Tsıfrlyq teńge alǵash ret eksporttyq jobaǵa baǵyttaldy

ASTANA. KAZINFORM — Qazaqstan damý banki Abaı oblysyndaǵy ósimdik maıyn syǵatyn zaýyttyń eksporttyq jobasyna tsıfrlyq teńgemen nesıe berdi.

Bul operatsııa birneshe qarjy uıymynyń atsalysýymen iske asty. Qazaqstan Damý Banki qarjy berýshi bolsa, TsentrKredıt banki osy operatsııany júzege asyratyn alań usyndy. Joba Qazaqstannyń Eksporttyq-kredıttik agenttigi arqyly saqtandyrylyp, tsıfrlyq teńgeni aınalymǵa engizý úderisine Ulttyq Bank pen «Ulttyq tólem korporatsııasy» AQ qatysty.

— Pılottyq rejımde Qazaqstan Damý Banki tsıfrlyq teńgemen «Qazaq-Astyq Group» JShS-ǵa shıkizat satyp alýǵa arnalǵan eksport aldyndaǵy qarjylandyrý aıasynda qaryz berdi. Kompanııanyń Abaı oblysynda ornalasqan maı ekstraktsııalaý zaýyty osy qoldaýmen eksportqa tazartylmaǵan kúnbaǵys jáne raps maıyn, kúnbaǵys pen raps shrotyn, sondaı-aq fosfatıdti kontsentrattardy óndirip otyr. Joba eksportty qoldaýǵa arnalǵan qarjylandyrý baǵdarlamasy aıasynda júzege asyryldy. Qaryzdyń bir bóligi tsıfrlyq teńgemen berildi. Qarajat ósimdik maıyn óndirýge qajetti shıkizatty satyp alýǵa jáne keıin ony eksporttaýǵa baǵyttalady, — delingen resmı málimette.

Qazaqstan Damý Bankiniń basqarma tóraǵasy Marat Elibaev tsıfrlyq teńgemen qaryz berý óte jyldam iske asqan operatsııa bolǵanyn aıtady.

— Onyń mańyzdy artyqshylyqtarynyń biri — markalaý múmkindigi. Bul qaryz qarajatynyń maqsatty paıdalanylýyn baqylaýdy kúsheıtýge jol ashady, — dedi bank basshysy.

QDB atalǵan pılottyq tásildi tsıfrlyq teńgeni eksportty qarjylandyrýda jáne ózge de qyzmetterde keńinen qoldaný múmkindikterin qalyptastyrýǵa negiz retinde qarastyryp otyr. 

Buǵan deıin «Damý» qory da tsıfrlyq teńgemen alǵashqy nesıesin bergenin jazǵan edik.