Qazaqstan men ıAndeks yntymaqtastyǵy aıasynda jańa jobalar iske qosylady
ASTANA.KAZINFORM — Qazaqstan Respýblıkasynyń Premer-mınıstri Oljas Bektenov ıAndekstiń bas dırektory bas dırektory Danııl Shýleıkomen jáne Yandex Qazaqstan jetekshisi Tımýr Shalekenovpen kezdesti. Bul týraly Úkimettiń baspasóz qyzmeti habarlady.
Onda Qazaqstanda tsıfrlyq servısterdi damytý, platformalyq jumyspen qamtý jáne tehnologııalyq jobalardy iske asyrý perspektıvalary talqylandy.
Qazirgi ýaqytta Úkimet ózin-ózi jumyspen qamtyǵandarǵa salyq salý erekshelikterin eskere otyryp, platformalyq jumyspen qamtýdy teń dárejede retteýdi jolǵa qoıý boıynsha jumys júrgizýde. Osy turǵyda Yandex Qazaqstan júzege asyryp jatqan bastama erekshe bir mańyzǵa ıe bolyp otyr.
ıAndeks Taksı elimizdegi alǵashqy salyq agenti bolyp otyr. Ótken jyldyń qyrkúıek aıynda iske qosylǵan sátten bastap platformaǵa qatysýshylardyń jalpy sany 86 myń adamǵa jetti. Jobany damytýǵa 4,9 mlrd teńgeden astam qarjy ınvestıtsııalandy, al agent retinde kompanııadan 4,3 mlrd teńge salyq ustalyp, bıýdjetke aýdaryldy.
— Memleket basshysy Qasym-Jomart Toqaev azamattarǵa yńǵaıly bolý úshin tsıfrlyq sheshimderdi qarqyndy túrde engizýdi tapsyrdy. Platformalyq jumyspen qamtýdy retteý barysyn tıimdi etý úshin Úkimet áleýmettik qorǵaýǵa, salyq salýǵa jáne ózin-ózi jumyspen qamtyǵandar men frılanserlerdiń quqyqtyq mártebesine jańasha ádispen qaraýǵa múddeli. Atalǵan sektordy kóleńkeden shyǵarý jáne ekonomıkaǵa belsendi túrde tartý úshin 2026 jylǵy 1 qańtardan bastap jańa salyq rejımine birtindep kóshý mańyzdy. Bul jerdegi másele bizdiń júzdegen myń azamattarymyzdyń qyzmetine qatysty bolyp otyr, — dep atap ótti Oljas Bektenov.
ıAndeks bas dırektory Danııl Shýleıko bizdiń elmen áriptestik jemisti júzege asyp jatqanyn atap ótip, kompanııanyń tehnologııalyq bastamalaryn damytýdy jalǵastyrý nıetin jetkizdi.
Odan bólek, kezdesý barysynda qalaaralyq jolaýshylar tasymaly servısin damytý josparlary da qaraldy. Búgingi tańda Yandex Qazaqstan elimizdegi negizgi baǵyttardyń basym bóligin qamtyp otyr.
Joldardaǵy qaýipsizdik máselelerine de basa nazar aýdaryldy. Jolaýshylar men júrgizýshilerdiń qaýipsizdigi úshin júrgizýshi kýálikterin tekserý engizildi, selfı-baqylaý jáne avtomobılderdi turaqty fototekserý júrgiziledi. Avtomatty basqarý júıesi jyldamdyqty, júrgizýshilerdiń sharshaý deńgeıin jáne basqa da parametrlerdi baqylaıdy. Shtattan tys jaǵdaılar men JKO naqty ýaqyt rejıminde tirkeledi, sondaı-aq marshrýttan aýytqýlar jáne basqa da táýekelder baqylanady.
Kompanııa júzege asyratyn basqa da tehnologııalyq bastamalarǵa nazar aýdaryldy. Máselen, pılottyq rejımde 1414 baılanys ortalyǵy arqyly qazaq jáne orys tilderinde sóıleıtin jasandy ıntellekt negizindegi daýystyq kómekshi engizilip jatyr. Qala kartasynda shuǵyl jedel járdem shaqyrýlaryn vızýalızatsııalaý jobasy ázirlenip jatyr.
Kezdesý qorytyndysy boıynsha taraptar birlesken jumysty jalǵastyrýǵa daıyn ekenderin bildirdi. Premer-mınıstr tsıfrlyq jobalardy birlesip júzege asyrý boıynsha jaýapty vedomstvolarǵa birqatar tapsyrma berdi.
Aıta ketelik Roman Sklıar «INNOPROM» halyqaralyq ónerkásiptik kórmesine qatysqan edi.