TsAHAL Netanıahý kabınetine Rafahtaǵy operatsııanyń josparyn usyndy
ASTANA. KAZINFORM – Izraıl qorǵanys kúshteri (TsAHAL) eldiń áskerı kabınetine Gaza sektorynyń ońtústiginde ornalasqan Rafah qalasynda qurlyq operatsııasynyń josparyn, sondaı-aq beıbit turǵyndardy urys aımaǵynan evakýatsııalaý josparyn usyndy. Bul týraly Izraıl premer-mınıstri Bınıamın Netanıahý keńsesi málim etti, dep habarlaıdy Euronews.
Bul málimdeme TsAHAL-dyń Rafahtaǵy qurlyq operatsııasy bastalar aldynda jasaldy. Netanıahý bul qalany 2023 jyldyń 7 qazanynda Izraılge keń aýqymdy shabýyl jasaǵan HAMAS radıkaldy ıslamdyq qozǵalysynyń «sońǵy qorǵany» dep ataıdy.
Atysty toqtatý týraly kelissózder jalǵasyp jatqanyna qaramastan, Izraıl premer-mınıstri Rafahtaǵy shabýyl operatsııasynyń josparyn keshiktirmeı bekitýge nıetti. Netanıahý jospardy bekitý úshin osy aptanyń basynda kabınet otyrysyn shaqyrǵysy keletinin málimdedi.
Rafah Gaza sektorynyń Mysyrmen shekarasynda ornalasqan. Izraıldiń Gaza sektorynda lańkesterge qarsy áskerı operatsııasy bastalǵaly qala mıllıonnan astam bosqyndy qabyldady.
Osy jaǵdaıdy eskere otyryp, Izraıldiń birqatar odaqtastary, sonyń ishinde AQSh ta sabyrlyqqa shaqyrdy. Degenmen, Benıamın Netanıahý Rafahtaǵy áskerı operatsııadan bas tartpaq emes. Onyń aıtýynsha, Rafahta HAMAS-tyń tórt batalony qalatyn bolsa, Izraıldiń soǵystaǵy maqsaty – sodyrlardy joıý múmkin emes.
Izraıl úkimetiniń Gaza sektoryna gýmanıtarlyq kómek jetkizý josparyn bekitkeni de atap ótildi. Bul jospar soltústik jáne basqa aımaqtarda tonaýshylyqty boldyrmaýǵa arnalǵan.
