TRK qyzmetkerleri dástúr boıynsha qan tapsyrdy
ASTANA.KAZINFORM — QR Prezıdenti Teleradıokesheniniń qyzmetkerleri jyl saıyn «Donor bol» erikti qan tapsyrý aktsııasyna qatysady, dep habarlaıdy Kazinform.
Búgin dástúr boıynsha ondaǵan jýrnalıs, operator men tehnıkalyq qyzmetkerler elordanyń qan qoryn tolyqtyrý úshin jyljymaly pýnktte qan tapsyrdy.
Birer saǵattyń ishinde jyljymaly pýnktte 41 adam qan tapsyrdy — barlyǵy 18 lıtr qan qabyldandy. Mundaı naýqan aýrýhanalardy qoldaýǵa kómektesedi. Sondaı -aq donor bolý mańyzdy ekenin eske salady.
Densaýlyq saqtaý mınıstrliginiń Transfýzıologııa ǵylymı-óndiristik ortalyǵynyń habarlaýynsha, Astanadaǵy 23 medıtsınalyq uıym donorlyq qanmen qamtamasyz etilgen. Jyl saıyn elordada 30 myńǵa jýyq donordyń arqasynda shamamen 60-70 myń doza qan quıylady — bul kúnine shamamen 120 adam. Halyqty qaıyrymdylyqqa tartý úshin ortalyq qyzmetkerleri kúnine myńǵa deıin qońyraý soǵady.
— Bir qan tapsyrý birden úsh adamnyń ómirin saqtap qalýy múmkin. Donor qany aýyr operatsııalar, bosaný, jaraqattar, qaterli isik jáne basqa da aýrýlar kezinde qajet. Siz ıgilik tizbeginiń bir bóligine aınalasyz. Turaqty qan tapsyrý aǵzany jańartýǵa, zat almasýdy jaqsartýǵa jáne júrek-qan tamyrlary aýrýlarynyń qaýpin azaıtýǵa kómektesedi, — dedi Ortalyq ókili Bulbul Sermenova.
Protsedýradan buryn donorlar mindetti medıtsınalyq tekserýden ótedi: olardyń qan toby anyqtalady, jalpy densaýlyǵy tekseriledi, múmkin bolatyn qarsy kórsetkishterdi boldyrmaý úshin anamnez jınalady. Al qan tapsyrǵannan keıin qatysýshylarǵa sháı men táttiler beriledi.
Jyljymaly qan tarsyrý pýnktteri qaladaǵy kásiporyndar men uıymdarǵa barady. Al 2025 jyldan bastap Moldaǵulova kóshesi, 33 mekenjaıy boıynsha ashylǵan Qan ortalyǵynyń ekinshi bólimshesi qala turǵyndary úshin qan tapsyrýdy burynǵydan da qoljetimdi etti.
Aıta ketý kerek, búginge deıin densaýlyq saqtaý salasyn damytýǵa qosqan úlesi úshin Astananyń 29 turǵyny «Qazaqstannyń qurmetti donory» tósbelgisimen marapattalǵan. «Qazaqstannyń qurmetti donory» ataǵyna taǵy bes úmitkerdiń qujattary Densaýlyq saqtaý mınıstrligine joldanyp, qaralyp jatyr.
Astananyń qurmetti donorlarynyń biri, 53 jastaǵy Anna Popova týraly maqalamyzdan oqyńyz.