Tramptyń ımmıgratsııa máselesi boıynsha reıtıngi tómendedi
ASTANA. KAZINFORM — Ótken aıda federaldy ımmıgratsııa agentteri amerıkalyq eki azamatty atyp óltirgennen keıin prezıdent Donald Tramptyń ımmıgratsııalyq saıasatyna qoldaý kúrt tómendedi, dep habarlaıdy Kazinform menshikti tilshisi.
NBC News arnasynyń SurveyMonkey platformasyndaǵy jańa saýalnamasyna sáıkes, ımmıgratsııa jáne shekara qaýipsizdigi uzaq ýaqyt boıy — 2024 jylǵy saılaý naýqany kezinde de, ekinshi merziminiń birinshi jylynda da Tramptyń kúshti jaqtary bolyp sanaldy. Endi onyń bul máseleler boıynsha reıtıngi jalpy maquldaý deńgeıine deıin tómendedi.
Tramptyń shekaralardy kúzetýmen ımmıgratsııa máselelerine qatysty áreketterine qatty qarsy respondentterdiń úlesi ótken jazda 38%-dan 49%-ǵa deıin ósti. Táýelsiz saılaýshylar arasynda bul kórsetkish tamyz aıynan beri 15%-ǵa ósti.
Osy arada AQSh prezıdentiniń jalpy reıtıngi de azdap tómendegen. Respondentterden Donald Tramptyń óz mindetterin oryndaýyn maquldaı ma degen suraqqa 39%-y maquldaıtynyn aıtsa, 61%-y teris jaýap bergen. 2025 jyldyń sáýirinde bul kórsetkishter sáıkesinshe 44% jáne 55% boldy.
Suralǵandardyń 63%-y federaldy úkimet shtattar men jergilikti basqarý organdarynyń ókilettikterin elemesten tym shekten shyǵyp ketti dep sanaıdy. Osy arada 37%-y shtattar men jergilikti basqarý organdary federaldy úkimetti elemeý arqyly óz ókilettikterin asyra paıdalanyp jatyr dep oılap otyr.
2025 jyldyń qyrkúıeginde AQSh prezıdenti Donald Tramptyń jalpy reıtıngi 43 paıyzdy qurap otyrǵanyn jazǵan bolatynbyz.
Al 2025 jylǵy qarasha aıynda AQSh prezıdenti Donald Tramptyń tanymaldyǵy 2025 jylǵy 20 qańtardaǵy ınaýgýratsııasynan bergi eń tómen kórsetkishke túskenin jazdyq.