Tramp TikTok kelisimindegi mıllıarderlerdiń esimin jarııalady

ASTANA.KAZINFORM — AQSh prezıdenti Donald Tramp Fox News arnasyna bergen suhbatynda álemniń eń baı adamdarynyń biri AQSh-ta TikTok-ty saqtap qalý kelisimine qatysýy múmkin ekenin aıtty, dep habarlaıdy CNBS. 

Tramp kelisimge Oracle tóraǵasy Larrı Ellıson men Dell Technologies bas dırektory Maıkl Dell qatysýy múmkin ekenin atap ótti.

— Bul komandada Lahlan Merdok pen Rýpert te bolýy múmkin. Meniń oıymsha, ekeýi de qatysady. Taǵy birneshe adam bar óte yqpaldy adamdar. Olar amerıkalyq patrıottar, ózderińiz bilesizder, olar óz elin jaqsy kóredi. Meniń oıymsha, olar tamasha jumys isteıdi, — dedi Tramp.

Rýpert Merdok — medıamagnat, News Corporation jáne 21st Century Fox medıaholdıngteriniń negizin qalaýshy jáne Wall Street Journal basylymynyń ıesi.

Lahlan Merdok — Rýpert Merdoktyń uly.

Jaǵdaıǵa jaqyn CNBC derekkóziniń aıtýynsha, Lahlan Merdoktyń kelisimge qatysýy ekitalaı, biraq ol atqarýshy tóraǵasy jáne bas dırektory qyzmetin atqaratyn Fox Corporation ról atqara alady.

Tramp málimdemeleri qytaılyq ByteDance kompanııasyna tıesili TikTok-qa Amerıka Qurama Shtattarynda jumysyn jalǵastyrýǵa múmkindik beretin kelisim boıynsha jalǵasyp jatqan kelissózder kezinde jasaldy.

Senbide Aq úı yqtımal mámileniń jańa málimetterin jarııalady: TikTok-ty baqylaıtyn dırektorlar keńesiniń jeti múshesiniń altaýy AQSh azamattary bolady. Sonymen qatar, Aq úıdiń baspasóz hatshysy Kerolaın Levıttiń aıtýynsha, TikTok algorıtmin baqylaý AQSh tarapyna beriledi, bul kelissózderdiń basty núktesi.

Levıtt sondaı-aq Oracle AQSh-ta derekterdi saqtaý jáne paıdalanýshynyń qupııalylyǵyna jaýap beretinin túsindirdi.

Buǵan deıin Tramp pen Qytaı tóraǵasy Sı Tszınpın juma kúni telefon arqyly sóılesken kezde bul kelisimdi talqylaǵan bolatyn. Qońyraýdan keıin Tramp kelisimniń aıaqtalýǵa jaqyn ekenin málimdedi.