Tramp Sı Tszınpınmen kezdesýi turaqtylyqqa ákeletinin aıtty
ASTANA. KAZINFORM - AQSh prezıdenti Donald Tramp Truth Social áleýmettik jelisinde taǵy da Qytaı basshysy Sı Tszınpınmen bolǵan kezdesýine arnap, jazba qaldyrdy. Tramp bul kezdesýdiń turaqty beıbit ómir men tabysty qamtamasyz etetinin aıtty.
Óz jazbasynda AQSh kóshbasshysy QHR tóraǵasy Sı Tszınpınmen G2 aıasynda bolǵan kezdesý eki tarap úshin de mańyzdy bolǵanyn atap ótti.
-Bul kezdesý turaqty beıbit ómir men tabysqa jeteleıdi,-dedi Donald Tramp.
Osyǵan deıin AQSh QHR-men uzaqmerzimdi saýda kelisiminen úmitti ekenin aıtqan. Tramp Amerıka aýyl sharýashylyǵy úshin AQSh-tan QHR-ǵa soıa jetkizý máselesi jaqyn arada sheshiletinin jetkizdi.
Buǵan qosa AQSh prezıdenti Qytaı fentanıl kontrabandasyna qarsy qosymsha sharalar qabyldaıdy dep senedi.
Aıta keteıik, osyǵan deıin Qytaıdyń AQSh-tan qaıtadan soıa satyp ala bastaǵany týraly jazdyq.