Tramp: Rafahtaǵy atystyń artynda HAMAS kóterilisshileri tur

ASTANA. KAZINFORM — Gaza sektorynyń ońtústigindegi Rafah qalasynda atysty toqtatý rejımin buzýdyń artynda palestınalyq HAMAS uıymy tur. Bul týraly AQSh prezıdenti Donald Tramp jýrnalısterge Air Force One bortynda málimdedi, dep jazdy Report.

Ol bul oqıǵaǵa HAMAS qozǵalysy basshylyǵynyń esh qatysy joq ekenin aıtty.  

— Biz HAMAS basshylyǵynyń qatysy joq dep esepteımiz. Bul HAMAS qozǵalysy quramyndaǵy kóterilisshiler bolýy múmkin. Qalaı bolǵanda da, biz óte qatal áreket etemiz, — dedi amerıkalyq kóshbasshy.

Buǵan deıin Izraıl áskeri anklavtyń ońtústigindegi Rafah qalasynyń mańynda sarbazdarǵa oq jaýdyrǵan oqıǵa týraly aıtyp, palestınalyq radıkaldardyń atysty toqtatý kelisimin buzǵanyn habarlady. Izraıl premer-mınıstri Bınıamın Netanıahý atysty toqtatý rejımin buzǵany úshin HAMAS-ty aıyptap, qarýly kúshterge radıkaldarǵa qarsy shara qoldanýǵa buıryq berdi. Sodan keıin armııa anklavqa birneshe soqqy jasap, ondaǵan nysanaǵa shabýyldady. Keıinirek áskerıler eki sarbazdyń qaza taýyp, taǵy bireýi aýyr jaralanǵanyn jetkizdi. 

Al HAMAS ókilderi Rafah oqıǵasyna qatysy joq ekenin aıtty.