Tramp Ońtústik Koreıa avtomobılderine tarıfti 25%-ǵa deıin kóterdi

ASTANA.KAZINFORM - AQSh prezıdenti Donald Tramp dúısenbi kúni Ońtústik Koreıa taýarlaryna «ózara» tarıfter men avtomobıl bajyn 15%-dan 25%-ǵa deıin kóteretinin jarııalady, dep habarlaıdy Yonhap. 

Ol muny Ońtústik Koreıa parlamenti ekijaqty saýda kelisimin ratıfıkatsııalaý boıynsha ishki protsedýralaryn áli aıaqtamaýymen túsindirdi.

- Ońtústik Koreıa parlamenti AQSh-pen jasalǵan kelisim sharttaryn oryndamaı otyr. Prezıdent Lı ekeýmiz 2025 jyldyń 30 shildesinde kelisimge keldik jáne ony 2025 jyldyń 29 qazanynda Koreıaǵa saparym kezinde rastadyq. Nelikten Koreıa parlamenti ony áli ratıfıkatsııalaǵan joq?- dep jazdy Tramp Truth Social saıtynda.

- Ońtústik Koreıa parlamenti bizdiń tarıhı saýda kelisimimizdi oryndamaǵandyqtan, men avtomobılderge, aǵash materıaldaryna, farmatsevtıkaǵa jáne basqa da barlyq ózara tarıfti 15%-dan 25%-ǵa deıin kóterip jatyrmyn, - dep keltiredi Ońtústik Koreıanyń Yonhap aqparat agenttigi Tramptyń sózin.

Bul bıliktegi Demokratııalyq partııanyń qarasha aıynda saýda jáne ınvestıtsııalyq kelisimdi júzege asyrý úshin Ulttyq jınalysqa engizgen zań jobasyna qatysty. Qujat áli qabyldanǵan joq.

Qarasha aıynda jarııalanǵan birlesken memorandýmǵa sáıkes, kelisim Ońtústik Koreıanyń AQSh ekonomıkasyna 350 mıllıard dollar ınvestıtsııa salýyn kózdegen. Onyń ornyna Vashıngton Seýlge qarsy jaýap tarıfteri men avtomobıl bajdaryn 15%-ǵa deıin tómendetti.

Qujatqa sondaı-aq Tramp ákimshiliginiń Ońtústik Koreıanyń ıadrolyq súńgýir qaıyqtardy satyp alýyn maquldaýy jáne azamattyq ýrandy baıytý jáne paıdalanylǵan ıadrolyq otyndy beıbit maqsatta qaıta óńdeý josparyn qoldaýy kirdi.

Aıta keteıik, Tramp JPMorgan Chase bankin sotqa berip, 5 mıllıard dollar talap etti.