Tramp munaı baǵasyn «ádeıi» tómendetip otyr ma

ASTANA. KAZINFORM – AQSh prezıdenti Donald Tramptyń álem elderine saýda tarıfterin kóterý týraly buıryǵynan keıin jahanda munaı baǵasy tómendeı bastady. Tipti, el arasynda «Tramp saıasaty arqyly «qara altyn» qunyn qoldan tóımendetip otyr» degen de qaýeset bar. Sebebi ol bılikke kelmes buryn munaı baǵasyn quldyratý jóninde birneshe márte málimdeme jasaǵan edi.

Saıasattanýshy Ǵazız Ábishevtiń aıtýynsha, munaı baǵasynyń tómendep nemese kóterilip otyrýy – bir ǵana adamnyń qolyndaǵy dúnıe emes.

– Álemdik munaı naryǵyndaǵy basty oıynshylar – Parsy shyǵanaǵyndaǵy monarhııalar, ásirese Saýd Arabııasy ról oınaýda. Olar qazir OPEK+ sekildi birlestik aıasynda tártip ornatyp, barlyq qatysýshylardyń belgilengen kvotalardy saqtaýyna kúsh salyp jatyr.

Tramp kelissózder júrgizýi múmkin, munaı óndirý kólemin ózi de arttyra alady. Biraq túsiný kerek, munaı baǵasynyń tym qatty quldyraýy amerıkalyq Chevron, Texxon sekildi alyp kompanııalarǵa, sonymen qatar shelftik jáne taqtatas munaıymen aınalysatyn Shell Oil sııaqty óndirýshilerge soqqy bolyp tıedi. Sondyqtan Tramp jalǵyz ózi munaı baǵasyn tómendetýge baǵyttalǵan saıasat júrgizip jatyr deý shyndyqqa janaspaıdy, – dedi sarapshy.

Ábishevtiń sózinshe, basty másele basqa – AQSh Qytaımen jáne jalpy álemmen saýda soǵysyn júrgizip jatyr. Bul búkil jahandyq ekonomıkanyń keleshegin bulyńǵyr etip, ekonomıkalyq belsendilikti tómendetedi. Sáıkesinshe, munaıǵa degen suranys ta azaıady. Soǵan saı munaı baǵasy túsip jatyr.

Munaı baǵasynyń quldyraýy ári qaraı jalǵasa bere me, álde bári ýaqytsha protsester me? Kazinform tilshisi sarapshylarmen birge «qara altyn» qunynyń keleshegine qatysty baılam jasap kórgen edi