Tramp mysqa 50% paıyz baj salyǵyn engizbekshi

ASTANA. KAZINFORM – Prezıdent Donald Tramp AQSh-qa ımporttalatyn mysqa 50 paıyzdyq baj salyǵyn salý jospary bar ekenin málim etti, dep habarlaıdy CNN.

Alaıda onyń qashan kúshine enetini belgisiz.

Aqpan aıynda Tramp prezıdentke ulttyq qaýipsizdikke baılanysty joǵary tarıfter engizýge múmkindik beretin zańdy negizge ala otyryp, mys ımportyna qatysty tekserý júrgizýdi buıyrdy.

Mys — elektronıka, tehnıka jáne avtokólik óndirýge qajetti negizgi komponent sanalady. Baj salyǵynyń kóterilýi bul taýarlardy amerıkalyq tutynýshylar úshin qymbattatyp jiberýi múmkin.

Saýda mınıstrliginiń málimetinshe, ótken jyly AQSh-qa mys ımportynyń kólemi 17 mıllıard dollardy qurady.

Tramptyń málimdemesinen keıin mys baǵasy rekordtyq kórsetkishke deıin ósti. Nıý-Iorkte fıýcherster 15 paıyzǵa ósip, bir fýnty $5,68 qurady.

Tramp sonymen qatar seısenbi kúni farmatsevtıkalyq preparattarǵa degen 200 paıyzdyq salyq jýyq arada engiziletinin málim etti. Alaıda kóptegen kompanııalardyń AQSh-qa kelýi úshin ol salyqty engizý keıingi qaldyrylýy múmkin.

Sáýir aıynda ákimshilik farmatsevtıkalyq preparattar ımportyna tekserýdi bastaǵan edi.

Prezıdent AQSh-qa ózge elderdiń jetkizilimine táýeldi bolmaý úshin medıtsınalyq preparattardyń ishki óndirisin jandandyrý kerek ekenin aıtty.

Keıbir farmatsevtıkalyq kompanııalar ózderiniń AQSh-taǵy óndiristerin keńeıtentinderin málim etti, alaıda olardyń keıbiriniń jobalary Tramptyń óz laýazymyna kiriserden buryn-aq daıyndyq ústinde bolatyn.

Osyǵan deıin Tramptyń saýda tarıfteriniń kúshine ený merzimin uzartqany týraly habarladyq.