Tramp Kongreste Zelenskııden hat alǵanyn habarlady

ASTANA. KAZINFORM — AQSh prezıdenti Donald Tramp Kongreste sóılegen sózinde Ýkraına prezıdenti Vladımır Zelenskııden Vashıngton men Kıev arasyndaǵy qarym-qatynasty qalypqa keltirýge kúsh salý týraly hat alǵanyn málimdedi, dep habarlaıdy The Hill.

— Hatta Ýkraınanyń múmkindiginshe tezirek kelissóz ústeline otyrýǵa daıyn ekendigi aıtylǵan. Osy hatty jibergeni úshin men oǵan rızamyn. Men ony jańa ǵana aldym, — dedi Donald Tramp.

Dúısenbi kúni Tramp Sopaq keńsedegi sátsiz kezdesýden keıin AQSh-tyń Ýkraınaǵa áskerı kómegin toqtatty.

AQSh prezıdenti Zelenskııdi beıbitshilikke daıyn emes dep aıyptady, al Tramp sheneýnikteri kelissózderden keıin AQSh pen Ýkraına arasyndaǵy sırek kezdesetin metaldar týraly kelisim talqylanbaǵanyn aıtty.

Zelenskıı Tramptan resmı túrde keshirim suraýdan tartynyp, seısenbi kúni Aq úıdegi kezdesýdi «ókinishti kezdesý» dep atady jáne Ýkraınanyń Reseımen kelisim ústeline otyrýǵa daıyn ekenin aıtty.

Tramp AQSh-tyń kelisimdi qaıta qaraıtyny týraly eshteńe aıtpady.

Zelenskııdiń 28 aqpanda Aq úıde Tramppen kezdesýi kezinde bolǵan oqıǵaǵa ókinish bildirgeni buǵan deıin de habarlanǵan bolatyn.